नाशिक (इंडिया दर्पण वृत्तसेवा)– शहरात घरफोडीची सत्र सुरूच असून वेगवेगळय़ा भागात झालेल्या दोन घरफोड्यांमध्ये चोरट्यांनी सुमारे सव्वा तीन लाखाच्या ऐवजावर डल्ला मारला. त्यात रोकडसह सोन्याचांदीच्या दागिण्यांचा समावेश आहे. याप्रकरणी पंचवटी व उपनगर पोलीस ठाण्यात गुन्हे दाखल करण्यात आले आहेत.
मखमलाबाद रोड येथील हेमा धनराज पाटील (रा. मधुबन कॉलनी) यानी दिलेल्या फिर्यादी नुसार पाटील कुटुंबिय गेल्या शुक्रवारी (दि.२५) बाहेरगावी गेले असता ही घरफोडी झाली. अज्ञात चोरट्यांनी त्यांच्या बंद घराचे कुलूप तोडून घरात प्रवेश केला. घरात शिरलेल्या चोरट्यांने बेडरूममधील कपाटात ठेवलेली एक लाख ४० हजाराची रोकड, सोन्याचांदीचे दागिणे व साड्या असा सुमारे २ लाख ३० हजाराचा ऐवज चोरून नेला. याप्रकरणी पंचवटी पोलीस ठाण्यात गुन्हा दाखल करण्यात आला असून अधिक तपास उपनिरीक्षक पंकज सोनवणे करीत आहेत.
दुसरी घटना टाकळीरोडवर घडली. विलास निवृत्ती पगार (रा. निकम हौ.सोसा.रामदास स्वामी नगर) यांनी याबाबत फिर्याद दिली आहे. पगार कुटूंबिय दि. ८ एप्रिल ते २९ जुलै दरम्यान आपल्या मुळगावी सिन्नर येथे गेलेले असतांना ही घटना घडली. अज्ञात चोरट्यांनी त्यांच्या बंद घराचा कडीकोयंडा तोडून बेडरूममधील कपाटात ठेवलेली १५ हजाराची रोकड व सोन्याचांदीचे दागिणे असा सुमारे ८० हजार रुपए किमतीचा ऐवज चोरून नेला. याप्रकरणी उपनगर पोलीस ठाण्यात गुन्हा दाखल करण्यात आला असून अधिक तपास हवालदार हिवाळे करीत आहेत.
