नाशिक (इंडिया दर्पण वृत्तसेवा)- शहरात घरफोडीची मालिका सुरू असून वेगवेगळया भागात भरदिवसा झालेल्या दोन घरफोडींमध्ये चोरट्यांनी सुमारे दहा लाखाच्या ऐवजावर डल्ला मारला. त्यात रोकडसह सोन्याचांदीच्या दागिन्यांचा समावेश आहे. याप्रकरणी उपनगर व सातपूर पोलीस ठाण्यात गुन्हे दाखल करण्यात आले आहेत.
वैशाली किशोर मैंद (रा.गौरीकमल सोसा.कॅनलरोड मंगलमुर्ती नगर जेलरोड) यांनी याबाबत फिर्याद दिली आहे. मैंद कुटुंबिय गुरूवारी (दि.१७) कामानिमित्त घराबाहेर पडले असता ही घटना घडली. अज्ञात चोरट्यांनी भरदिवसा त्यांच्या बंद घराचे कुलूप तोडून सुमारे २५ हजार रूपयांची रोकड व सोन्याचांदीचे दागिणे असा सुमारेस ७ लाख ८० हजार ७०० रूपये किमतीचा ऐवज चोरून नेला. याप्रकरणी उपनगर पोलीस ठाण्यात गुन्हा दाखल करण्यात आला असून अधिक तपास सहाय्यक निरीक्षक दाभाडे करीत आहेत.
दुसरी घरफोडी सोमेश्वर भागात घडली. शांताराम लहानू चौधरी (रा.सोनाली गार्डन अपा.सोमेश्वर कॉलनी) यांनी याबाबत फिर्याद दिली आहे. चौधरी कुटुंबिय बुधवारी (दि.१६) कामानिमित्त घराबाहेर पडले असता ही घटना घडली. अज्ञात चोरट्यांनी त्यांचे बंद घर फोडून बेडरूममधील कपाटात ठेवलेले सुमारे १ लाख ९६ हजार २५० रूपये किमतीचे अलंकार चोरून नेले. याबाबत सातपूर पोलीस ठाण्यात गुन्हा दाखल करण्यात आला असून अधिक तपास जमादार मुसळे करीत आहेत.
