नाशिक (इंडिया दर्पण वृत्तसेवा)- शहरात मोटारसायकल चोरीची मालिका सुरूच असून नुकत्याच तीन दुचाकी चोरट्यांनी वेगवेगळय़ा भागातून चोरून नेल्या.
याप्रकरणी सरकारवाडा, मुंबईनाका व अंबड पोलीस ठाण्यात गुन्हे दाखल करण्यात आले आहेत. पंचवटीतील कुणाल विश्वनाथ शिनकर (रा.टकलेनगर) हे रविवारी (दि.६) मोबाईल दुरूस्तीसाठी एम.जी.रोड भागात गेले होते. डेरी डॉन दुकानासमोर लावलेली त्यांची एमएच १५ जेटी २१९१ मोटारसायकल चोरट्यांनी चोरून नेली. याबाबत सरकारवाडा पोलीस ठाण्यात गुन्हा दाखल करण्यात आला असून अधिक तपास हवालदार बागुल करीत आहेत. दुसरा प्रकार आर.डी.सर्कल भागात घडला. याबाबत प्रमोद सुकदेव पवार (रा.ठक्कर एन्क्लेव अपा.आर.डी.सर्कल) यांनी याबाबत फिर्याद दिली आहे.
पवार यांची एमएच ०२ एफएस ३५८२ मोपेड गेल्या मंगळवारी (दि.८) रात्री त्यांच्या सोसायटीच्या पार्किंगमध्ये लावलेली असतांना ती चोरट्यांनी चोरून नेली. याबाबत मुंबईनाका पोलीस ठाण्यात गुन्हा दाखल करण्यात आला असून अधिक तपास हवालदार गोडे करीत आहेत. तिसरी घटना सिडकोतील दत्तचौकात घडली. गोकुळ अशोक पारधी (रा.महादेव मंदिराजवळ दत्तचौक,सिडको) यांनी याबाबत फिर्याद दिली आहे. पारधी यांची एमएच १९ डीजे ५९७० मोटारसायकल गेल्या शनिवारी (दि.५) दुपारच्या सुमारास त्यांच्या घर परिसरात लावलेली असतांना चोरट्यांनी ती चोरून नेली. याबाबत अंबड पोलीस ठाण्यात गुन्हा दाखल करण्यात आला असून अधिक तपास हवालदार संगम करीत आहेत.
