नाशिक (इंडिया दर्पण वृत्तसेवा)– शहरात विनयभंगाचे प्रकार वाढले असून, सफाई कामगार महिलेसह एका मुलीचा नातलगाने विनयभंग केल्याचा प्रकार समोर आला आहे. सफाई कामगार महिलेला मारहाण करीत विनयभंग करण्यात आला. तर तरूणीस समजवून सांगण्याचा बहाणा करीत नातलगाने विनयभंग केला असून त्यास पोलीसांनी अटक केली आहे. याप्रकरणी आडगाव व अंबड पोलीस ठाण्यात गुन्हे दाखल करण्यात आले आहेत.
पोलीसांनी दिलेल्या माहितीनुसार सफाई कामगार असलेली पीडिता गुरूवारी (दि.३) सकाळच्या सुमारास आडगाव पोलीस ठाण्याच्या हद्दीत साफसफाई करीत असतांना एकाने वरिष्ठांकडे तक्रार करण्याची धमकी देत हुजत्त घातली. यावेळी संशयिताने शिवीगाळ व मारहाण करीत तिचा विनयभंग केला. याप्रकरणी आडगाव पोलीस ठाण्यात गुन्हा दाखल करण्यात आला असून अधिक तपास हवालदार राजुळे करीत आहेत.
दुसरा प्रकार अंबड औद्योगीक वसाहतीत घडला. पिडीत तरूणी बुधवारी (दि.२) सायंकाळी आपल्या आजीच्या घरी गेली होती. या ठिकाणी आईशी वाद घालत असतांना नातलगाने तिला मी समजावून सांगतो असा बहाणा करीत बेडरूममध्ये नेत विनयभंग केला. याबाबत अंबड पोलीस ठाण्यात गुन्हा दाखल करण्यात आला असून पोलीसांनी संतोष जगताप नामक संशयितास अटक केली आहे.
