नाशिक (इंडिया दर्पण वृत्तसेवा)- लग्नाचे आमिष दाखवून वधू पक्षास गंडा घालणा-या बापलेकास बेड्या ठोकण्यात मुंबईनाका पोलीसांना यश आले आहे. शहरातील तरूणीशी विवाहाबाबत बोलणी करीत या बापलेकाने कुटुंबियाकडून हुंडारूपी होंडा सिटी कार बुलेट व २४ लाखांची रोकड उकळली होती.
मुस्तफा मेहबुब जोगीलकर (२६) व मेहबुब उमरसाहब जोगीलकर अशी अटक करण्यात आलेल्या संशयितांची नावे असून त्यांना जिल्हा व सत्र न्यायालयाने पोलीस कोठडी सुनावली आहे. तक्रारदार युवती व संशयित मुस्तफा जोगीलकर यांची शादी डॉट कॉम या संकेतस्थळाच्या माध्यमातून ओळख झाली होती. संशयिताने लग्नाचे आमिष दाखविल्याने हा विवाह ठरला होता. दोन्ही कुटुंबियांनी एकमेकांच्या गाठी भेटी घेत विवाह निश्चीत केला होता. या काळात संशयिताने नाशिक गाठून तरूणीवर वेळोवेळी बलात्कारही केला. गेल्या ८ जानेवारी ते १५ मे दरम्यान वर पक्षाच्या मागणीनुसार वधूकडील मंडळीने संशयितास होंडासिटी कार, बुलेट व २४ लाख रूपयांची रोकडही अदा केली. त्यानंतर मात्र ठकबाज बापलेकाचा भांडाफोड झाला.
याप्रकरणी मुंबईनाका पोलीस ठाण्यात गुन्हा दाखल करण्यात आला होता. पोलीस संशयितांच्या मागावर असतांना गुन्हे शोध पथकाचे सहाय्यक निरीक्षक जितेंद्र वाघ याच्या पथकास मिळालेल्या माहितीच्या आधारे मुस्तफा जोगीलकर यास पनवेल जि. नवी मुंबई येथे त मेहबुब जोगीलकर यास खामगाव ता. म्हसळा जि. रायगड येथे बेडया ठोकण्यात आल्या पोलीस तपासात मुस्तफा जोगीलकर हा शादी डॉट कॉम, जीवनसाथी डॉट कॉ, मझमॅच, बेटक हाफ,डिव्होर्स मेट्रोमोनी या संकेतस्थळावर मुस्तफा जोगीलकर उर्फ मुस्तफा खान उर्फ हर्षवर्धन उर्फ मोहन पाटील या नावाने प्रोफाईल बनवून व आपल्या वडिलांच्या मदतीने महिला व मुलींना जाळयात ओढून आर्थीक फसवणुक करीत असल्याचे समोर आल असून, संशयितांकडून कारसह बुलेट हस्तगत करण्यात आले आहे. ही कारवाई वरिष्ठ निरीक्षक संतोष नरूटे, सहाय्यक निरीक्षक जितेंद्र वाघ, जमादार राजू टेमगर,अंमलदार अरूण होंडे,सागर जाधव आदींच्या पथकाने केली.
