नाशिक (इंडिया दर्पण वृत्तसेवा)- बसमध्ये चढतांना गर्दीची संधी साधत भामट्यांनी महिलेची पर्स हातोहात लांबविली. ही घटना मेळा बसस्थानकात घडली असून पर्समध्ये सुमारे १ लाख ६८ हजार रूपये किमतीचे अलंकार होते. याप्रकरणी सरकारवाडा पोलीस ठाण्यात चोरीचा गुन्हा दाखल करण्यात आला आहे.
पोलीसांनी दिलेल्या माहितीनुसार आशा अंबादास अहिरे (५६ रा.बेलगाव ता.वैजापूर हल्ली सप्तशृंगी चाळ,बुध्दविहार पाथर्डी फाटा) यांनी याबाबत फिर्याद दिली आहे. अहिरे गेल्या सोमवारी (दि.३०) दुपारच्या सुमारास बाहेरगावी जाण्यासाठी मेळा बसस्थानकात गेल्या असता ही घटना घडली.
बसमध्ये चढत असतांना गर्दीची संधी साधत अज्ञात चोरट्यांनी त्यांच्या पिशवीत ठेवलेली पर्स हातोहात लांबविली. या पर्समध्ये दोन सोन्याच्या पोती व अंगठी असा सुमारे १ लाख ६८ हजार रूपये किमतीचा ऐवज होता. ही बाब निदर्शनास येताच अहिरे यांनी पोलीसात धाव घेतली असून अधिक तपास हवालदार गायकवाड करीत आहेत.
