नाशिक (इंडिया दर्पण वृत्तसेवा)- शहरात विनयभंगाचे प्रकार वाढले असून, वेगवेगळया भागात नुकत्याच चार घटना घडल्यात. त्यात दोन अल्पवयीन मुलींसह महिलाचा परिचीतांनी विनयभंग केला. याप्रकरणी म्हसरूळ गंगापूर,इंदिरानगर व उपनगर पोलीस ठाण्यात गुन्हे दाखल करण्यात आला आहे.
पोलीसांनी दिलेल्या माहितीनुसार विनयभंगाचा पहिला प्रकार मखमलाबाद येथील शांतीनगर भागात घडला. रविवारी (दि.१५) दुपारच्या सुमारास बिल्डींगच्या पार्किंगमध्ये उभ्या असलेल्या भावास पाणी देण्यासाठी गेलेल्या अल्पवयीन मुलीचा इमारतीत राहणा-या विशाल गुंजाळ नामक युवकाने विनयभंग केला. पाणी देवून जिन्याने घराकडे जाणा-या मुलीस आपल्या घरात ओढून घेत संशयिताने मुलीचा विनयभंग केला. यावेळी त्याने वाच्यता केल्यास आईस जीवे ठार मारण्याची धमकी दिल्याने हा प्रकार पोलीसात पोहचला असून पीडितेच्या आईन संशयितास जाब विचारला असता त्याने शिवीगाळ व दमदाटी करीत मारहाण केल्याने मुलीच्या आईने पोलीसात धाव घेतली आहे. याबाबत म्हसरूळ पोलीस ठाण्यात विनयभंगासह पोस्को कायद्यान्वये गुन्हा दाखल करण्यात आला आहे. अधिक तपास उपनिरीक्षक गावीत करीत आहेत.
दुसरा प्रकार औद्योगीक वसाहतीतील शिवाजीनगर भागात घडला. पीडित महिला आपल्या घरात एकटी असता अमोल खोतकर नामक संशयिताने पाठीमागील दाराने बळजबरीने घरात प्रवेश करून महिलेचा विनयभंग केला. पीडित महिलेने प्रतिकार करण्याचा प्रयत्न केला असता संशयिताने तिला शिवीगाळ करीत बांबूच्या काठीने मारहाण केल्याने हा प्रकार पोलीसात पोहचला असून याप्रकरणी गंगापूर पोलीस ठाण्यात गुन्हा दाखल करण्यात आला आहे. अधिक तपास हवालदार बागुल करीत आहेत.
तिसरी घटना फाळके स्मारक भागात घडली. छेड काढण्याच्या वादातून कुटुंबिय मारहाण करीत टोळक्याने अल्पवयीन मुलीचा विनयभंग केला. शहरातील कुटूंबिय शनिवारी (दि.१४) फाळके स्मारक भागात फिरण्यासाठी गेले होते. पांडवलेणींसह फाळके स्मारकात फेरफटका मारून सायंकाळच्या सुमारास कुटूंबिय आपल्या वाहनांजवळ आले असता ही घटना घडली. वाहन पार्किंग परिसरात उभ्या असलेल्या टोळक्याने अल्पवयीन मुलीची छेड काढली त्यामुळे पालकांनी संबधीतांना जाब विचारला असता संतप्त तीन ते चार जणांच्या टोळक्याने मुलीचा विनयभंग करीत कुटूबियास बॅटने मारहाण केली. या घटनेत दोन महिलांच्या गळयातील सोन्याच्या अलंकार तुटून नुकसान झाले असून याप्रकरणी इंदिरानगर पोलीस ठाण्यात गुन्हा दाखल करण्यात आला आहे. अधिक तपास हवालदार पवार करीत आहेत.
चौथी घटना जेलरोड भागात घडली. नणंदच्या घरी वडिलोपार्जीत इस्टेटीचा वाद मिटविण्यासाठी गेलेल्या महिलेचा पुतण्याने विनयभंग केला. महिला व तिचे कुटुंबिय रविवारी (दि.१५) लोखंडे मळा भागात राहणा-या आपल्या नणंदच्या घरी गेली होती. वडिलोपार्जीत शेती व जुने घर वाटणीचा वाद सुरू असतांना पीडितेच्या पुतण्याने तिचा विनयभंग केला. या घटनेत संशयितानी पीडितेच्या पतीसह मुलांना मारहाण केल्याचे तक्रारीत नमुद करण्यात आले आहे. याप्रकरणी उपनगर पोलीस ठाण्यात गुन्हा दाखल करण्यात आला असून अधिक तपास उपनिरीक्षक गोसावी करीत आहेत.
