नाशिक (इंडिया दर्पण वृत्तसेवा)- दामदुप्पट रक्कम देण्याचे आमिष दाखवून एका बांधकाम व्यावसायीकाने दोघांकडून लाखों रूपये उकळल्याचा प्रकार समोर आला आहे. कॉलेजरोड भागातील जुनी सदनीकेची दुरूस्ती करून विक्रीतून मिळणा-या रकमेतून मोबदला देण्याची ग्वाही दिली होती. मात्र दहा महिने उलटूनही गुंतवणुक आणि मोबदला न मिळाल्याने फसवणुक झालेल्या शिक्षकासह अन्य एकाने पोलीसांत धाव घेतली असून याघटनेत सुमारे ४६ लाख रूपयांना गंडविण्यात आल्याचा प्रकार पुढे आला आहे. याप्रकरणी म्हसरूळ पोलीस ठाण्यात गुन्हा दाखल करण्यात आला आहे.
राजू सिताराम मानमोठे (रा. वृंदावन नगर, किशोर सुर्यवंशी मार्ग म्हसरूळ) असे गुन्हा दाखल करण्यात आलेल्या संशयित बांधकाम व्यावसायीकाचे नाव आहे. रामदास हरी पवार (रा.पवार कॉलनी, आरटीओ समोर पेठरोड) या शिक्षकाने याबाबत फिर्याद दिली आहे. संशयित मानमोठे याने गेल्या वर्षी शिक्षक रामदास पवार यांची भेट घेतली होती. यावेळी त्याने कॉलेजरोड भागात जुनी सदनिका खरेदी केल्याची बतावणी करून हा फ्लॅट रिनेव्हेशन करून बंगल्याच्या किमतीत विक्री करणार असल्याचे सांगितले. यावेळी त्याने तुम्ही गुंतवणुक केल्यास तुम्हाला डबलचे पैसे देण्याचे आमिष दाखविले.
पवार यांचा विश्वास संपादन करण्यात आल्याने त्यांनी २३ जुलै ते १ ऑगष्ट दरम्यान संशयिताला १५ लाख ५० हजार रूपये ऑनलाईन अदा केले. मात्र दहा महिने उलटूनही संशयिताने गुंतवणुकीची अथवा मोबदलाची रक्कम दिली नाही. संशयिताने टाळाटाळ केली असता पवार यांनी पोलीसात धाव घेतली असून त्यांच्या पाठोपाठ अन्य एका गुंतवणुकदारानेही संशयिताविरोधात तक्रारी दाखल केली आहे. भामट्याने दोघांना ४६ लाख रूपयांना फसविले असून परिसरातील नागरीकांनाही या प्रकारचे आमिष दाखवत गंडविल्याची चर्चा आहे. अधिक तपास उपनिरीक्षक क्षिरसागर करीत आहेत.
