नाशिक (इंडिया दर्पण वृत्तसेवा)- शहरात घरफोडीचे सत्र सुरूच असून नुकत्याच झालेल्या घरफोडींमध्ये चोरट्यांनी सुमारे सव्वा सात लाख रूपये किमतीच्या ऐवजावर डल्ला मारला. त्यात रोकडसह सोन्याचांदीच्या दागिन्यांचा समावेश आहे. याप्रकरणी गंगापूर, अंबड, सातपूर व देवळाली कॅम्प पोलीस ठाण्यात गुन्हे दाखल करण्यात आले आहेत.
पोलीसांनी दिलेल्या माहितीनुसार ध्रुवनगर भागात राहणा-या तानाजी श्रावण कुवर यांनी घरफोडीची पहिली फिर्याद दिली आहे. कुवर कुटुंबिय गुरूवारी (दि.१२) बाहेरगावी गेले असता ही घरफोडी झाली. अज्ञात चोरट्यांनी कुवर यांच्या बंद घराच्या सेफ्टी डोअरचा कडीकोयंडा तोडून बेडरूममधील कपाटात ठेवलेली रोकड व सोन्याचांदीचे दागिणे असा सुमारे ४ लाख ५१ हजार रूपये किमतीचा ऐवज चोरून नेला. याबाबत गंगापूर पोलीस ठाण्यात गुन्हा दाखल करण्यात आला असून अधिक तपास सहाय्यक निरीक्षक महाजन करीत आहेत.
दुसरी घरफोडी चुंचाळे शिवारात झाली. मंदा राहूल ठोके (रा.घरकुल योजना अंबड) यांनी याबाबत फिर्याद दिली आहे. ठोके कुटूंबिय बुधवारी (दि.११) बाहेरगावी गेले असता अज्ञात चोरट्यांनी त्यांच्या बंद घराचा कडीकोयंडा तोडून कपाटात ठेवलेल्या गल्यातील १२ हजाराची रोकड व सोन्याचांदीचे दागिणे असा सुमारे ६१ हजार २०० रूपये किमतीचा ऐवज चोरून नेला. याबाबत अंबड पोलीस ठाण्यात गुन्हा दाखल करण्यात आला असून अधिक तपास हवालदार चव्हाण करीत आहेत.
तिसरी घटना सातपूर औद्योगीक वसाहतीतील सातमाऊली चौकात घडली. याबाबत अनिल धर्मराज खैरणार (रा.डिएस पार्क महेंद्रा मटेरिअल गेट समोर) यांनी फिर्याद दिली आहे. गुरूवारी (दि.१२) रात्री अज्ञात चोरट्यांनी खैरणार यांचे घरफोडून कपाटातील ४० हजाराची रोकड व सोन्याचे अलंकार असा समारे ४९ हजाराचा ऐवज चोरून नेला. याप्रकरणी सातपूर पोलीस ठाण्यात गुन्हा दाखल करण्यात आला असून अधिक तपास उपनिरीक्षक राठोड करीत आहेत.
चौथी घटना नाणेगाव ता.जि.नाशिक येथे घडली. याबाबत पुतूलदेवी जिमदार सिंग यांनी याबाबत फिर्याद दिली आहे. सिंग कुटुंबिय गेल्या महिन्यात १५ ते २० दिवसांसाठी मुळगावी गेले होते. या काळात अज्ञात चोरट्यांनी बंद घराच्या किचनमधील खिडकीचे गज कापून ही चोरी केली. घरात शिरलेल्या भामट्यांनी लोखडी कपाटात ठेवलेली एक लाखाची रोकड व सोन्याचांदीचे दागिणे असा सुमारे १ लाख ६० हजार रूपये किमतीचा ऐवज चोरून नेला. याबाबत देवळाली कॅम्प पोलीस ठाण्यात गुन्हा दाखल करण्यात आला असून अधिक तपास हवालदार जगदाळे करीत आहेत.
