नाशिक (इंडिया दर्पण वृत्तसेवा)– सदनिकांची परस्पर विक्री करून ठाण्याच्या एकाने शहरातील वृध्दास लांखोंचा गंडा घातल्याचा प्रकार समोर आला आहे. या घटनेत लहान ६० लाख रूपयांची फसवणुक झाल्याचा आरोप करण्यात आला असून याप्रकरणी मुंबईनाका पोलीस ठाण्यात गुन्हा दाखल करण्यात आला.
प्रमोद विश्वनाथ दोडके (रा.सृष्टी कॉम्प्लेक्स मीरारोड ठाणे) असे गुन्हा दाखल करण्यात आलेल्या संशयित ठकबाजाचे नाव आहे. याबाबत अनिल रामचंद्र हरिनामे (७१ रा. टाकळीरोड) यांनी फिर्याद दिली आहे. हरिनामे यांच्या मालकिच्या तीन सदनिकांची संशयिताने सन.२०१८ मध्ये परस्पर विक्री केली. यापोटी मिळालेल्या ८५ लाख ८३ हजार रूपयांपैकी २५ लाख ७५ हजार रूपये संशयिताने हरिनामे यांच्या शहरातील खरवंदा पार्क येथील महाराष्ट्र बँकेत आरटीजीएस व फोन पेच्या माध्यमातून जमा केले.
मात्र उर्वरीत रक्कम देण्यास टाळाटाळ केल्याने हरिनामे यांनी पोलीसात धाव घेतली असून या घटनेत त्यांची ६० लाख ८ हजार रूपयांची फसवणुक करण्यात आल्याचा आरोप करण्यात आला आहे. अधिक तपास सहाय्यक निरीक्षक वाघ करीत आहेत.
