नाशिक (इंडिया दर्पण वृत्तसेवा)- गंगापूररोडवरील नवश्या गणपती भागात झालेल्या घरफोडीत चोरट्यांनी सुमारे अडिच लाखाच्या ऐवजावर डल्ला मारला. त्यात दोन लाखाची रोकड सोन्याचे दागिणे व चांदीच्या ताब्याचा समावेश आहे. याप्रकरणी गंगापूर पोलीस ठाण्यात गुन्हा दाखल करण्यात आला आहे.
मनिषा अशोक आहेर (रा. पाटील नेस्ट जवळ नवश्या गणपती परिसर आनंदवली) यांनी फिर्याद दिली आहे. आहेर कुटूंबिय रविवारी (दि.८) बाहेरगावी गेले असता ही घरफोडी झाली. अज्ञात चोरट्यांनी लॅच लॉक तोडून बेडरूममधील कपाटात ठेवलेली दोन लाखाची रोकड, सोन्याचे गंठण व चांदीचा तांब्या असा सुमारे २ लाख ४५ हजार रूपये किमतीचा ऐवज चोरून नेला. अधिक तपास उपनिरीक्षक मोतीलाल पाटील करीत आहेत.
सेवानिवृत्त वृध्दाचा दुचाकीस्वारांनी मोबाईल हिसकावून नेला
नाशिक (इंडिया दर्पण वृत्तसेवा)- मोबाईलवर बोलत रस्त्याने पायी जाणा-या सेवानिवृत्त वृध्दाच्या हातातील मोबाईल ट्रिपलसीट दुचाकीस्वारांनी हिसकावून नेला. हा प्रकार शरणपूर पोलीस चौकी पासून काही अंतरावर घडला. या घटनेत ४५ हजार रूपये किमतीचा मोबाईल भामट्यांनी हिसकावून नेला असून याप्रकरणी सरकारवाडा पोलीस ठाण्यात गुन्हा दाखल करण्यात आला आहे.
लक्ष्मीकांत शिवकुमार शुक्ल (६० रा.रूषीराज अव्हेन्यू बिल्डींगमागे कॅनडा कॉर्नर) यांनी याबाबत फिर्याद दिली आहे. शासकिय सेवेतून निवृत्त झालेले शुल्क गेल्या २४ मे रोजी रात्री जेवण आटोपून नेहमी प्रमाणे शरणपूररोडवर फेरफटका मारत असतांना ही घटना घडली.
मोबाईलवर बोलत ते फेरफटका मारत असतांना शरणपूर पोलीस चौकी पासून काही अंतरावर असलेल्या एमराल्ड पार्क या हॉटेल परिसरात दुचाकीवर ट्रीपलसिट आलेल्या भामट्यांनी त्यांच्या हातातील मोबाईल हिसकावून पोबारा केला. अधिक तपास हवालदार माळोदे करीत आहेत.
