नाशिक (इंडिया दर्पण वृत्तसेवा)-किशोर सुर्यवंशी मार्गावर भाजीपाला खरेदी करून घराकडे परतणा-या महिलेच्या गळयातील सोनसाखळी दुचाकीस्वार भामट्यांनी ओरबाडून नेली. याप्रकरणी म्हसरूळ पोलीस ठाण्यात गुन्हा दाखल करण्यात आला आहे.
शैलजा सुरेश जडे (६७ रा.बानगंगा सोसा.बिरसा मुंडा हॉस्पिटल जवळ) यांनी याबाबत फिर्याद दिली आहे. जडे या मंगळवारी (दि.१) रात्री भाजीपाला खरेदी करण्यासाठी नजीकच्या मिरसा मुंडा चौकात गेल्या होत्या. भाजीपाला खरेदी करून त्या रस्त्याने घराकडे पायी जात असतांना ही घटना घडली.
बानगंगा सोसायटीजवळ दुचाकीवर तोडबांधून डबलसिट आलेल्या भामट्यांनी त्यांच्या गळय़ातील सुमारे ४० हजार रूपये किमतीची सोनसाखळी ओरबाडून पोबारा केला. अधिक तपास उपनिरीक्षक क्षिरसागर करीत आहेत.
४० हजार रूपये किमतीचा लॅपटॉप चोरीला
नाशिक (इंडिया दर्पण वृत्तसेवा)-उघड्या घरातून चोरट्यांनी सुमारे ४० हजार रूपये किमतीचा लॅपटॉप चोरून नेला. ही घटना हिरावाडी रोड भागात घडली असून याप्रकरणी पंचवटी पोलीस ठाण्यात चोरीचा गुन्हा दाखल करण्यात आला आहे.
सिध्देश रामनाथ रोकडे (२० रा. भिकुसा मिल समोर,मौनगिरीनगर) या युवकाने याबाबत फिर्याद दिली आहे. रोकडे गेल्या सोमवारी (दि.३०) रात्री आपल्या घरात असतांना ही चोरी झाली. अज्ञात चोरट्याने उघड्या घरात शिरून टेबलावर ठेवलेला लॅपटॉप चोरून नेला. अधिक तपास हवालदार खाजेकर करीत आहेत.
……
