नाशिक (इंडिया दर्पण वृत्तसेवा)- पोलीसात तक्रार देण्यासाठी निघालेल्या बापलेकाची दुचाकी अडवित टोळक्याने दोघांवर धारदार कोयत्याने हल्ला केल्याची घटना पाथर्डी फाटा भागात घडली. या घटनेत बापलेक जखमी झाले असून याप्रकरणी इंदिरानगर पोलीस ठाण्यात चार जणांविरोधात गुन्हा दाखल करण्यात आला आहे.
यश मोहन खिंवसरा, जुबेर जाकिर शेख, रिहान रफिक शहा व सुरज डोंगरे (रा.सर्व दामोदर चौक,पाथर्डी फाटा) अशी गुन्हा दाखल करण्यात आलेल्या संशयितांची नावे आहेत. याबाबत अमित नामदेव जाधव (३२ रा.आनंदनगर,पाथर्डी शिवार) यांनी फिर्याद दिली आहे. संशयित यश खिवसरा याने शिवीगाळ केल्याने अमित जाधव व त्यांचे वडिल नामदेव जाधव हे दोघे बापलेक रविवारी (दि.८) रात्री साडे बारा वाजेच्या सुमारास दुचाकीवर पोलीस ठाण्यात तक्रार देण्यासाठी निघाले असता ही घटना घड़ली.
खिवसरा व त्याच्या साथीदारांनी पाठलाग करीत जाधव यांची मोटारसायकल अडविली. यावेळी संशयित टोळक्याने बापलेकास बेदम मारहाण करीत त्यांच्यावर धारदार कोयत्याने वार केले. या घटनेत नामदेव जाधव यांच्या डोक्यात कोयत्याने वार करण्यात आल्याने ते गंभीर जखमी झाले असून अधिक तपास उपनिरीक्षक शिरसाठ करीत आहेत.
