नाशिक (इंडिया दर्पण वृत्तसेवा)- मिळकत खरेदी विक्रीत एकाने शेजा-यालाच चुना लावल्याचा प्रकार समोर आला आहे. व्यवहारातील रोकड पदरात पाडून घेत भामट्याने सदर मिळकत परस्पर दुस-यास विक्री केल्याने हा प्रकार पोलीसात पोहचला असून, याप्रकरणी सरकारवाडा पोलीस ठाण्यात तीन संशयिताविरोधात गुन्हा दाखल करण्यात आला आहे. त्यात दोन महिलांचा समावेश आहे.
पोलीसांनी दिलेल्या माहितीनुसार सोनाली साहेबराव पवार (३६ रा.अशोकनगर,सातपूर), गणेश शंकर अत्रे व विद्यूलता राजेद्रकुमार पाटणकर (रा.आनंदवली,गंगापूररोड) अशी संशयितांची नावे आहेत. याबाबत जितेंद्र भास्करराव शिंदे (रा.साक्री जि.धुळे हल्ली पुणे) यांनी फिर्याद दिली आहे. शिंदे यांची गोवर्धन शिवारातील गट नं. ४८ मध्ये मिळकत आहे. या मिळकतीच्या शेजारी पाटणकर यांची खाते क्र. ५८९ मधील मिळकत आहे. सोनाली पवार व गणेश अत्रे यांनी हा व्यवहार घडवून आणला. बनावट दस्तऐवज दाखवून शिंदे यांचा विश्वास संपादन करीत ही फसवणुक करण्यात आली.
ऑगष्ट २०२४ मध्ये ठक्कर बाजार परिसरात याबाबत व्यवहार झाला. यापोटी संबधीताना २५ लाख रूपये अदा करण्यात आले. मात्र संबधीतांनी व्यवहार पूर्ण केला नाही. यानंतर पाटणकर यांनी ही मिळकत दुस-या व्यक्तीला विक्री केल्याचा आरोप करण्यात आला असून अधिक तपास सहाय्यक निरीक्षक डगळे करीत आहेत.
