नाशिक (इंडिया दर्पण वृत्तसेवा)– पर्यटनासाठी आलेल्या परदेशी पाहूण्यास लुटणा-या रिक्षाचालकास पोलीसांनी बेड्या ठोकल्या. उपनगर नाका सिग्नल भागात ही घटना घडली होती. शहर गुन्हे शाखेच्या युनिट १ पथकाने शिर्डी नाशिक मार्गावरील पांगरी शिवारात रिक्षाचालकाच्या मुसक्या आवळल्या असून, त्याच्या ताब्यातून गुह्यात वापरलेली रिक्षा व मोबाईल असा सव्वा लाखाचा मुद्देमाल हस्तगत करण्यात आला आहे.
जगदिश दादाजी कापडणीस (४२ मुळ रा. संगमेश्वर मालेगाव हल्ली विराम लॉज,कानडे हनुमान मंदिराजवळ) असे अटक करण्यात आलेल्या संशयिताचे नाव आहे. याबाबत प्रदिप रंगनाथ गिते (४५ रा.कॉलेजरोड) यांनी याबाबत फिर्याद दिली आहे. कॅनडा येथील काही परदेशी पाहूने नाशकात पर्यटनासाठी आले आहेत. त्यातील एक जण २९ मे रोजी रात्री साडे दहाच्या सुमारास मद्याच्या नशेत असतांना लॉजिंगच्या शोधार्थ नाशिकरोडच्या दिशेने रवाना झाला असता ही घटना घडली होती. सदर इसम ठक्कर बाजार बसस्थानक परिसरातून एमचएच १५ ईएच ७२७२ या रिक्षात बसून प्रवासास लागला होता. प्रवाशी मद्याच्या नशेत असल्याची संधी साधत चालकाने उपनगर नाका सिग्नल भागात रिक्षा निर्जनस्थळी नेली. या ठिकाणी दमदाटी करीत प्रवाश्याच्या गळय़ातील सोनसाखळी, हातातील अंगठी व मोबाईल बळजबीने हिसकावून घेतली. तसेच प्रवाश्यास उतरून देत पोबारा केला होता.
याबाबत उपनगर पोलीस ठाण्यात गुन्हा दाखल करण्यात आला होता. या गुन्ह्याचे गांभिर्य ओळखून पोलीस यंत्रणा कामाला लागली होती. युनिटचे अंमलदार आप्पा पानवळ व राम बर्डे यांना मिळालेल्या माहितीच्या आधारे भामटा रिक्षाचालक पोलीसांच्या हाती लागला. जगदिश कापडणीस याने हा गुन्हा केला असून तो प्रवासी भरून शिर्डी येथे गेल्याची माहिती पोलीसांना मिळाली होती. त्यानुसार पथकाने शिर्डी गाठून नजीकच्या पांगरीगावाजवळ संशयिताच्या मुसक्या आवळल्या असून त्याच्या ताब्यातून गुह्यातील रिक्षासह मोबाईल असा सुमारे १ लाख २० हजार रूपये किमतीचा मुद्देमाल हस्तगत करण्यात आला आहे.
संशयितास मुद्देमालासह उपनगर पोलीसांच्या स्वाधिन करण्यात आले आहे. ही कारवाई वरिष्ठ निरीक्षक मधुकर कड यांच्या मार्गदर्शनाखाली सहाय्यक निरीक्षक हिरामण भोये, उपनिरीक्षक चेतन श्रीवंत हवालदार महेश साळुंके,अंमलदार आप्पा पानवळ, राम बर्डे, उत्तम पवार,रमेश कोळी,विलास चारोस्कर, मुक्तार शेख, जगेश्वर बोरसे,समाधान पवार आदींच्या पथकाने केली.
