नाशिक (इंडिया दर्पण वृत्तसेवा)- भरघोस मोबदल्याचे आमिष दाखवून सायबर भामट्यांनी शहरातील गुंतवणुकदारांना ३७ लाख रूपयांचा ऑनलाईन गंडा घातला आहे. आयपीओ खरेदी करण्यास भाग पाडून ही फसवणुक करण्यात आली असून याप्रकरणी सायबर पोलीस ठाण्यात फसवणुकीचा गुन्हा दाखल करण्यात आला आहे.
पोलिसांनी दिलेल्या माहिती नुसार जलिश रोशन कुरेशी (रा. वडाळा रोड, नाशिक) यांनी याबाबत फिर्याद दिली आहे. फिर्यादी व इतर तक्रारदार यांच्याशी निशा अग्रवाल अनोळखी या टेलिग्राम युझर महिलेने संपर्क साधला होता. टेलिग्राम ग्रुपमध्ये अ‍ॅड करून या ग्रुपवर टास्कविषयी माहिती देण्यात आली. त्यानंतर सदर महिलेने फिर्यादी व अन्य तक्रारदारांशी व्हाईस कॉलच्या माध्यमातून बोलत असे अ‍ॅपद्वारे फियार्दीला एअरपाझ बुकिंगचे रेटिंग दिल्यावर यामध्ये चांगले कमिशन मिळत असल्याचे भासविले, तसेच विविध बँकांच्या खात्यांवर २३ लाख ८७ हजार ९३४ रुपये भरण्यास भाग पाडून फियार्दीची आर्थिक फसवणूक केली.
तसेच तक्रारदार साक्षी विजय वाघ यांचे पती विजय वाघ यांना एक्स्चेंज ग्रुप-६५ या टेलिग्राम ग्रुपमध्ये अ‍ॅड करून घेतले व विविध आयपीओचे शेअर्स खरेदी करण्यास सांगून वेळोवेळी ७ लाख २२ हजार रुपये व सचिन दादाजी गवांदे यांनाही अश्याच पध्दतीने गंडविण्यात आले. गवांदे यांनीही विविध बँक खात्यात ५ लाख ८० हजार ५०० रुपये भरण्यास भाग पाडून आर्थिक फसवणूक केली. या प्रकरणात फिर्यादी व इतर तक्रारदारांची एकूण ३६ लाख ९० हजार ४३४ रुपयांची ऑनलाईन फसवणूक झाली असून अधिक तपास वरिष्ठ पोलीस निरीक्षक ढवळे करीत आहेत.
