नाशिक (इंडिया दर्पण वृत्तसेवा)– आठ हजार फॉलोवर असलेल्या इन्स्टाग्रामधारक अल्पवयीन मुलाने आयडी न दिल्याच्या वादातून त्यास बेदम मारहाण करण्यात आल्याचा प्रकार समोर आला आहे. भद्रकाली पोलीसांच्या गस्ती पथकाच्या प्रसंगावधानाने या घटनेत जीवे मारण्याचा प्रयत्न टळला असून पथकाने वेळीच धाव घेत चॉपर हिसकावल्याने इन्स्टाग्राम धारक बालक बालंबाल बचावला आहे. याप्रकरणी एकास बेड्या ठोकत पथकाने दोघा अल्पवयीन मुलांना ताब्यात घेतले आहे.
पोलीसांनी दिलेल्या माहितीनुसार फरीद मन्सुरी (१९) असे अटक करण्यात आलेल्या युवकाचे नाव आहे. शहरातील वाढत्या खूनाच्या घटना रोखण्यासाठी पोलीस ठाणे निहाय गस्तीवर भर दिला जात आहे. भद्रकालीचे त्रिकोणी गार्डन बीट मार्शल संतोष आव्हाड व अझरूद्दीन इनामदार यांचे पथक शुक्रवारी (दि.३०) गोदावरी नदी पात्रावरील कन्नमवार पुल परिसरात गस्त घालत असतांना हा प्रकार समोर आला. परप्रांतीय दोन मुलाची वाट अडवत संशयितासह दोन अल्पवयीन मुले त्यांना मारहाण करीत होते. यावेळी १७ वषीय मुलास खाली पाडून त्याच्या गळयावर धारदार चॉपर लावण्यात आला होता. ही बाब पोलीसांच्या निदर्शनास येताच पथकाने धाव घेत चॉपर हिसकावून घेत सर्व मुलांना ताब्यात घेतले. पोलीस ठाण्यात आणून सर्वांची चौकशी केली असता सतरा वर्षी मुलाचे इन्स्टाग्राम या सोशल साईडवर आठ हजार फॉलोवर असून त्याने इन्स्टाग्राम आयडी देण्यास नकार दिल्याने संशयिताने त्यास जीवे मारण्याचा प्रयत्न केल्याचा प्रकार समोर आला.
पोलीसांनी तात्काळ गुन्हा दाखल करून संशयितास अटक केली असून त्याच्या दोन अल्पवयीन साथीदारांना सुरक्षेकामी मुलांचे निरीक्षण गृह येथे ठेवण्यात आले आहे. ही कारवाई वरिष्ठ निरीक्षक गजेंद्र पाटील यांच्या मार्गदर्शनाखाली अमलदार संतोष आव्हाड,अझरूद्दीन इनामदार तसेच गुन्हे शोध पथकाचे सहाय्यक निरीक्षक सत्यवान पवार,उपनिरीक्षक दिपक तोंडे,हवालदार संदिप शेळके,नरेंद्र जाधव लक्ष्मण ठेपणे,जावेद शेख नारायण गवळी आदींच्या पथकाने केली.
