नाशिक (इंडिया दर्पण वृत्तसेवा)- महसूल विभागात नायब तहसिलदार असल्याचे भासवून एका ठकबाजाने महिलेस लग्न करण्याचे आमिष दाखवून लाखोंना चूना लावल्याचा प्रकार समोर आला आहे. पदोन्नती मिळविण्यासाठी लाखोंची रोकड उकळवत भामट्याने महिलेस गंडविले असून, चौकशीअंती पितळ उघडे पडल्याने महिलेने पोलीसात धाव घेतली आहे. याप्रकरणी आडगाव पोलीस ठाण्यात फसवणुकीचा गुन्हा दाखल करण्यात आला आहे.
निनाद प्रविण कापुरे उर्फ निनाद विनय कापुरे (रा.एरंडोलरोड धारणगाव जळगाव) असे संशयित ठकबाजाचे नाव आहे. बळी मंदिर परिसरात राहणा-या ३८ वर्षीय महिलेने याबाबत फिर्याद दिली आहे. सन. २०२४ मध्ये संशयित महिलेच्या संपर्कात आला होता. महसूल विभागात नायब तहसिलदार पदावर कार्यरत असल्याची बतावणी केल्याने दोघामध्ये मैत्री झाली. संशयिताने विश्वास संपादन केल्याने या मैत्रीचे रूपांतर प्रेमात झाले. या काळात अबला महिलेस संशयिताने लग्नाचे आमिष दाखविले. त्यानंतर एके दिवशी त्याने तहसिलदार पदी पदोन्नती मिळणार असून पुणे येथे नियुक्ती मिळविण्यासाठी मोठी रक्कम लागणार असल्याचे सांगितले. यावेळी त्याने महिलेस विश्वासात घेत सात लाख रूपयांची मदत मागितली. सदर रक्कम दोन ते तीन दिवसात परत करण्याची ग्वाही देत संशयिताने लग्नननंतर
आपले भविष्य चांगले होईल असे आमिष दाखवत महिलेस शोधाशोध करण्यास भाग पाडले. संशयिताने तगादा लावल्याने पीडितेने नातेवाईकांकडून हातऊसनवार रक्कम गोळा करीत ३ व ४ डिसेंबर २०२४ रोजी अनुक्रमे ५० हजार, तीन लाख व अडिच लाख रूपये आरटीजीएसच माध्यमातून तर फोन पे च्या माध्यमातून एक लाख रूपये अदा केले. मात्र अनेक दिवस उलटूनही सशयिताने पैसे परत न केल्याने महिलेने त्याचा पाठपुरावा केला असता संशयिताने टाळाटाळ केली. मी अडचणीत आलो असून लवकरच तुझे पैसे परत करील अशी बतावणी करीत तसेच पुण्यात असल्याचे सांगून वेळ मारून नेली. यानंतर महिलेने त्याचा शोध घेत चौकशी केली असता त्याचा खोटारडेपणा समोर आला. उच्चपदस्थ अधिकारी नसतांना संशयिताने खोटे नाव सांगून पीडितेस आपल्या गळाला अडकविल्याचे लक्षात आले. महिलेने संशयिताशी संपर्क साधत पोलीसात जाण्याची धमकी दिली असता त्याने दोन लाख रूपयांची रक्कम परत केली. तरीही महिलेने पोलीसात धाव घेतली असून पाच लाख रूपयांची फसवणुक केल्याचा आरोप तिने केला आहे. अधिक तपास हवालदार बनकर करीत आहेत.
