नाशिक (इंडिया दर्पण वृत्तसेवा)– किशोर सुर्यवंशी मार्गावरील ओंकारनगर भागात टोळक्याने मंगळवारी (दि.२८) मध्यरात्री दहशत माजविली. इमारतीच्या पार्किंगमध्ये लावलेल्या वाहनांची तोडफोड करीत टोळक्याने दोघांना जीवे ठार मारण्याची धमकी देत बेदम मारहाण केली. या घटनेत एकाच्या गळ्यातील सोनसाखळी हिसकावून भामट्यांनी पोबारा केला असून याप्रकरणी म्हसरूळ पोलीस ठाण्यात दरोड्याचा गुन्हा दाखल करण्यात आला आहे.
सोनू धात्रक, प्रिन्स सहाणी, चेतन गायकवाड,प्रणव मनेरे व त्यांचे दहा बारा साथीदार अशी गुन्हा दाखल करण्यात आलेल्या संशयितांची नावे असून त्यातील सोनू धात्रक हा पोलीस रेकॉर्डवरील गुन्हेगार आहे. याप्रकरणी प्रदिप बाबुलाल काकडे (रा.ओमकारनगर,किशोर सुर्यवंशी मार्ग) यांनी याबाबत फिर्याद दिली आहे. संशयित टोळक्याने मंगळवारी रात्री पावणे बारा वाजेच्या सुमारास परिसरात दहशत माजवित धुडघूस घातला. यावेळी संतप्त टोळक्याने कुठलेही कारण नसतांना आपला मोर्चा काकडे यांच्या सोसायटीकडे वळवित हे कृत्य केले. इमारतीच्या पार्किंगमध्ये लावलेल्या एमएच १४ एचडब्ल्यू ७०८१, एमएच १५ एए ३०४९, एमएच ४१ बीई ६८८९ व एमएच १५ डीसी १६९६ या वाहनांच्या दगड, विटा व कोयत्याने काचा फोडल्या.
यावेळी सोसायटीचे सदस्य विजय रावळ व तक्रारदार प्रदिप काकडे यांनी विरोध केला असता संशयितांनी त्यांना शिवीगाळ व दमदाटी करीत लाकडी दांडक्यासह हॉकी स्टिकने बेदम मारहाण केली. या घटनेत एकाने जीवे ठार मारण्याची धमकी देत काकडे यांच्या गळय़ातील सुमारे ९० हजार रूपये किमतीची सोनसाखळी बळजबरीने हिसकावून पोबारा केला असून अधिक तपास उपनिरीक्षक परदेशी करीत आहेत.
