नाशिक (इंडिया दर्पण वृत्तसेवा)- पूर्व वैमनस्यातून रहदारीच्या ठिकाणी एकमेकांवर प्राणघातक हल्ला केल्याचा प्रकार महामार्गावरील इनायत कॅफे हॉटेल भागात घडला. या घटनेत एकाचा गळा चिरण्यात आला असून दुस-यास बेदम मारहाण करण्यात आली आहे. याबाबतचा व्हिडीओ सोशल मिडीयावर व्हायरल होताच शहर गुन्हे शाखेच्या युनिट १ पथकाने दोन्ही गटातील चौघांना अटक केली असून त्यात दोन महिलांचाही समावेश आहे.
रोहित रंगनाथ गोरडे, मयुरी रोहित गोरडे (रा.दिक्षीत चाळ,खैरे गल्ली भद्रकाली), ऐश्वर्या विकास भुजग (रा.मुंबईनाका) व दिगंबर उर्फ दत्ता निवृत्ती आंधळे (रा.कलानगर दिंडोरीरोड) अशी अटक करण्यात आलेल्या संशयितांची नावे आहेत. दिपक संजय कपीले ( ३५ रा.श्री दुर्वांकुर अपा.रविवार कारंजा) या युवकाने दिलेल्या फिर्यादीनुसार रविवारी (दि.२५) रात्री दहा वाजेच्या सुमारास दिपक कपीले आपल्या घरी असतांना संशयित गोरडे यांच्या पत्नीने त्याच्याशी संपर्क साधला होता. पतीसह आम्ही तीन महिला इनायत कॅफे या हॉटेल परिसरात मद्यपान करीत असतांना एकीचा नवरा तेथे आला व तो मैत्रीणीस बेदम मारहाण करीत असल्याचे खोटे सांगितले. त्यामुळे कपीले मित्र दत्ता आंधळे यास सोबत घेवून इनायत कॅफे भागात गेला असता त्याच्यावर प्राणघातक हल्ला करण्यात आला.
मद्यधुंद गोरड याने शिवीगाळ करीत तुला ठरवून बोलावले असून आज तुझा गेमच वाजवतो असे म्हणत कपीलेवर हल्ला केला. या घटनेत कमरेला लावलेले धारदार शस्त्र काढून कपीलेच्या गळयावर वार करण्यात आला असून झटापटीत त्याच्या कानासही चावा घेण्यात आला आहे. तर मयुरी गोरडे या विवाहीतेने दिलेल्या फिर्यादीनुसार इनायत कॅफे या हॉटेलमध्ये जेवणासाठी गेलो असता दिपक कपिले याने इंदिरानगर जॉंगीग ट्रॅक भागात बोलावून घेत पतीवर जिवघेणा हल्ला केला. दिपक व त्याचा मित्र दत्ता आंधळे याने पतीस शिवीगाळ करीत सोबत आणलेल्या लाकडी दांडक्याने बेदम मारहाण केली. या घटनेत पतीच्या डोक्यास व डोळयास गंभीर दुखापत झाली असल्याचे म्हटले आहे.
याप्रकरणी मुंबईनाका पोलीस ठाण्यात परस्परविरोधी जीवे ठार मारण्याचा प्रयत्न केल्याप्रकरणी गुन्हा दाखल करण्यात आला असून युनिटचे हवालदार प्रशांत मरकड व पोलीस नाईक मिलींदसिंग परदेशी यांना मिळालेल्या माहितीच्या आधारे गोरडे दांम्पत्यास सिडकोतील त्रिमुर्ती चौकातील शिवशक्ती चौक भागात अटक करण्यात आली आहे. तर अन्य महिलेस जुनी तांबटलेन येथील इच्छामणी प्राईड या इमारतीतून ताब्यात घेण्यात आले आहे. दरम्यान ही कारवाई सुरू असतांनाच पोलीस नाईक विशाल देवरे यांना मिळालेल्या माहितीच्या आधारे प्रतिस्पर्धी गटातील दत्ता आंधळे यास चोपडा लॉन्स भागात बेड्या ठोकण्यात आल्या असून संशयितांना मुंबईनाका पोलीसांच्या स्वाधिन करण्यात आले आहे.
ही कारवाई युनिटचे वरिष्ठ निरीक्षक मधुकर कड यांच्या मार्गदर्शनाखाली सहाय्यक निरीक्षक हिरामण भोये, उपनिरीक्षक रविंद्र बागुल,चेतन श्रीवंत,सुदाम सांगळे हवालदार प्रशांत मरकड, विशाल काठे, संजिप भांड, प्रदिप म्हसदे, प्रविण वाघमारे, योगीराज गायकवाड,नाझीमखान पठाण, पोलीस नाईक मिलींदसिंग परदेशी, विशाल देवरे अंमलदार अमोल कोष्टी, जगेश्वर बोरसे, हवालदार शर्मिला कोकणी, अनुजा येलवे, उपनिरीक्षक किरण शिरसाठ व समाधान पवार आदींच्या पथकाने केली.
