नाशिक (इंडिया दर्पण वृत्तसेवा)- मखमलाबादरोडवरील क्रांतीनगर भागात भरदिवसा झालेल्या घरफोडीत चोरट्यांनी सुमारे तीस हजाराच्या ऐवजावर डल्ला मारला. त्यात लॅपटॉपसह सोन्याचांदीचे दागिणे व घड्याळाचा समावेश आहे. याप्रकरणी पंचवटी पोलीस ठाण्यात गुन्हा दाखल करण्यात आला आहे.
आदेश चांगदेव ढिकले यांनी याबाबत फिर्याद दिली आहे.
ढिकले कुटुंबिय शुक्रवारी (दि.२३) सकाळच्या सुमारास कामानिमित्त घराबाहेर पडले असता ही घटना घडली. अज्ञात चोरट्यानी बंद घराचे सेफ्टी दरवाजाचे कोयंडा तोडून ही चोरी केली. चोरट्यांनी टेबलावरील लॅपटॉप,सॅनडिस्क व पर्स चोरून नेली. पर्स मध्ये चांदीचा करंडा व घड्याळ असा सुमारे २९ हजार ५०० रूपये किमतीचा ऐवज होता. अधिक तपास हवालदार बाविस्कर करीत आहेत.
सराईत पोलीसांच्या जाळय़ात
नाशिक (इंडिया दर्पण वृत्तसेवा)- पिस्तूल बाळगणारा सराईत पोलीसांच्या जाळय़ात अडकला आहे. सिन्नरफाटा भागात संशयिताच्या मुसक्या आवळण्यात आल्या असून त्याच्या अंगझडतीत मिळून आलेला काडतुसाने भरलेला गावठी कट्टा हस्तगत करण्यात आला आहे. याप्रकरणी नाशिकरोड पोलीस ठाण्यात गुन्हा दाखल करण्यात आला आहे.
राहूल अजय उज्जेनवाल (२५ रा.फर्नांडीसवाडी जयभवानीरोड) असे अटक करण्यात आलेल्या संशयित पिस्तूलधारीचे नाव आहे. याबाबत अंमलदार अजय देशमुख यांनी फिर्याद दिली आहे. नाशिकरोड उपनगर व इंदिरानगर पोलीसांच्या रेकॉर्डवरील संशयिताकडे पिस्तूल असल्याची माहिती नाशिकरोड पोलीसांना मिळाली होती. पोलीस त्याच्या मागावर असतांनाच शुक्रवारी (दि.२३) दुपारी तो सिन्नरफाटा परिसरातील शिखलकर वस्ती भागात मिळून आला. त्याच्या अंगझडतीत काडतुसांनी भरलेला गावठी पिस्तूल आढळून आला आहे. पिस्तूल जप्त करीत पोलीसांनी संशयितास अटक केली असून अधिक तपास हवालदार टेमगर करीत आहेत.
