नाशिक (इंडिया दर्पण वृत्तसेवा)- शेतजमिनीत अनधिकृतपणे प्रवेश करीत शेजा-याने जेसीबीच्या सहाय्याने बांध तोडून नुकसान केल्याचा प्रकार आडगाव शिवारातील गट न. २०१३ मध्ये घडले. या घटनेत शेतातील उभ्या ज्वारी पिकाचे नुकसान झाले असून याप्रकरणी आडगाव पोलीस ठाण्यात दोघांविरोधात गुन्हा दाखल करण्यात आला आहे. त्यात जेसीबी चालकाचाही समावेश आहे.
प्रणव बगवान जाधव व जेसीबी चालक विजय भोसले अशी गुन्हा दाखल करण्यात आलेल्या संशयितांची नावे आहेत. याबाबत दमयंती जयराम जाघव (७० रा.सिंगापूर गार्डन टाकळीरोड) यांनी फिर्याद दिली आहे. दमयंती जाधव यांच्या ताब्यातील गट न.२०१३ मध्ये संशयितानी गेल्या १२ एप्रिल रोजी दुपारच्या सुमारास जेसीबी घेवून अनधिकृत प्रवेश केला. कुठलेही कारण नसतांना संशयितांनी जेसीबीच्या माध्यमातून शेतातील बांध तोडले.
यावेळी बांधाखालून गेलेली पाईप लाईनही तुटली. याबाबत जाब विचारण्यासाठी दमयंती जाधव या जाब विचारण्यासाठी गेल्या असता तू येथून निघून जा तुझा या शेतजमिनीशी काही एक संबध नाही अशी दमदाटी करीत संशयितांनी नुकसान करून हाकलून दिल्याचे फिर्यादीत म्हटले आहे. अधिक तपास हवालदार बनकर करीत आहेत.
