नाशिक (इंडिया दर्पण वृत्तसेवा)– इमारतीत झाडू पोच्या करण्यासाठी बालकामगार नियुक्त करणे एका सोसायटीच्या महिला चेअरमनच्या चांगलेच अंगलट आले आहे. मुलांची काळजी व संरक्षण कायद्यान्वये कमी पगारात श्रमाचे काम करून घेतल्याचे उघड झाल्याने सदर महिले विरोधात उपनगर पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार स्मिता चरणजित कटोरोडे (रा. आराधना रेसि.आर्टीलरी सेंटर रोड नाशिकरोड) असे गुन्हा दाखल करण्यात आलेल्या संशयित महिला चेअरमनचे नाव आहे. याबाबत दुकान निरीक्षक सुरेश लोहार यांनी फिर्याद दिली आहे. कटोरोडे या आराधना रेसिडन्सी या सोसायटीच्या चेअरमन असून त्याच्या इमारतीत बालकामगाराकडून झाडू पोच्या करून घेतला जात असल्याची माहिती कामगार उपायुक्त कार्यालयास प्राप्त झाली होती. त्यानुसार शुक्रवारी (दि.१६) सकाळी पथकाने शिवकॉलनीतील आराधणा रेसिडेन्सी ए विग व बि विग येथे छापा टाकला असता तेथे गाडेकर मळा भागात राहणारा पंधरा वर्षीय मुलगा काम करतांना मिळून आला. सदर बालकामगार ईमारतीमध्ये झाडु मारणे, आपार्टमेंटची सापसफाई करणे इत्यादी कामे करीत होता.
पथकाने केलेल्या चौकशीत तो महिना भरापासून या सोसायटीत काम करीत असून त्याला सकाळी सहा ते दुपारी बारा या दरम्यानच्या कामाच्या मोबदल्यात दरमहा चार हजार रूपये पगार दिला जातो. तसेच रविवारी सुट्टी मिळत असल्याचे त्याने सांगितले. चेअरमन महिलेकडून कमी वेतनात जास्त श्रमाचे काम करून त्यांचे आर्थिक, मानसिक, शारिरीक शोषण निदर्शनास आल्याने पथकाने बालकामगाराची सुटका करीत त्याची काळजी व सुरक्षेच्या दृष्टीने उंटवाडी येथील बाल निरीक्षण गृहात रवानगी केली आहे. अधिक तपास पोलीस नाईक बोडके करीत आहेत.
