नाशिक (इंडिया दर्पण वृत्तसेवा)- दोरीच्या सहाय्याने इमारतीवरून उतरणा-या ५५ वर्षीय कामगाराचा जमिनीवर पडल्याने मृत्यू झाला. ही घटना सिन्नरफाटा भागात घडली. याप्रकरणी नाशिकरोड पोलीस ठाण्यात मृत्यूची नोंद करण्यात आली आहे.
निंबा महिपत भोपाल (रा.भगवा चौक,चेहडी पंपीग) असे मृत कामगाराचे नाव आहे. भोपाल बुधवारी (दि.१४) सकाळी चेहडी शिव येथील मंगलमुर्ती संकुल येथे ड्रेनेज चोकअपचे काम करण्यासाठी गेले होते. इमारतीच्या पाईपातील चोकअप काढून ते दोरीच्या सहाय्याने जमिनीवर उतरत असतांना ही दुर्घटना घडली. दुस-या मजल्यावरून खाली उतरत असतांना अचानक दोरीचा हात सुटल्याने ते जमिनीवर कोसळले होते.
या घटनेत त्यांच्या पाठीस गंभीर दुखापत झाल्याने त्यांना जमीर मोहम्मद सैय्यद यांनी तात्काळ बिटको रूग्णालयात दाखल केले असता उपचार सुरू असतांना डॉ. अंकिता शिरसाठी यांनी त्याना तपासून मृत घोषीत केले. अधिक तपास पोलीस नाईक मोरे करीत आहेत.
