नाशिक (इंडिया दर्पण वृत्तसेवा)- शहरात घरफोडीची मालिका सुरूच असून वेगवेगळया ठिकाणी झालेल्या चार घरफोड्यांमध्ये चोरट्यांनी सुमारे पावणे चार लाखाच्या ऐवजावर डल्ला मारला. त्यात पंचवटीतील एकाच इमारतीत झालेल्या तीन घरफोडींचा समावेश आहे. या घरफोडींमध्ये चोरट्यानी रोकडसह सोन्याचांदीच्या दागिणे चोरून नेले. याप्रकरणी पंचवटी व आडगाव पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार सोमवारी (दि.१२) रात्री पंचवटीतील साई कलश अपार्टमेंट मधील नागरीक बाहेरगावी गेल्याची संधी साधत चोरट्यांनी एकाच इमारतीतील तीन घरे फोडून सुमारे सव्वा दोन लाख रूपये किमतीचा ऐवज चोरून नेला. याबाबत आदित्य दिपक पाटील यांनी फिर्याद दिली आहे. पाटील यांच्या घरातून भामट्यांनी एक लाखाची रोकड तर शेजारी राहणा-या प्रांजली सुधाकर शेवाळे यांच्या बंद घराचे कुलूप तोडून चोरट्यांनी कपाटात ठेवलेली १५ हजाराची रोकड व ७० हजार रूपये किमतीचे मंगळसूत्र चोरून नेले. तर याच इमारतीतील प्रविण मधुकर शेजवळ यांचे घरफोडून चोरट्यांनी कपाटात ठेवलेली ५ हजाराची रोकड व २५ हजार रूपये किमतीचे सोन्याचांदीचे अलंकार चोरून नेले. याप्रकरणी पंचवटी पोलीस ठाण्यात एकत्रीत गुन्हा दाखल करण्यात आला असून अधिक तपास उपनिरीक्षक सचिन चव्हाण करीत आहेत.
चौथी घटना कोणार्कनगर भागात घडली. रोहित दिगंबर बर्वे (रा. शिव रो हाऊस कोणार्क नगर २) यांनी याबाबत फिर्याद दिली आहे. बर्वे कुटुंबिय १९ एप्रिल ते ५ मे दरम्यान बाहेरगावी गेले असता ही घटना घडली. अज्ञात चोरट्यांनी त्यांच्या बंद घराचा कडीकोयंडा तोडून कपाटात ठेवलेली रोकड व सोन्याचांदीचे दागिणे असा सुमारे १ लाख ६० हजार रूपये किमतीचा ऐवज चोरून नेला. याबाबत आडगाव पोलीस ठाण्यात गुन्हा दाखल करण्यात आला असून अधिक तपास हवालदार बनकर करीत आहेत.
