नाशिक (इंडिया दर्पण वृत्तसेवा)– हप्ता न दिल्याने संतप्त टोळक्याने घराच्या काचा फोडून परिसरात दहशत माजविल्याची घटना विहीतगाव येथे घडली. या घटनेत चार जणांच्या टोळक्याने दरवाजा व प्लॅस्टीकचे ड्रम धारदार कोयत्याने फोडून नुकसान केले असून, याप्रकरणी नाशिकरोड पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार राहूल उर्फ भांड्या तेलोरे (रा.बागुलनगर,विहीतगाव), अनिकेत उर्फ केरला राजू जॉन (रा.सुभाषरोड ना.रोड), समिर शेख (रा.विजयनगर, जयभवानीरोड) व यश दंडगव्हाळ (रा.जेलरोड) अशी गुन्हा दाखल करण्यात आलेल्या संशयित गावगुंडाची नावे आहेत. याबाबत अशोक हिरामण बागुल (६१ रा.बागुलनगर विहीतगाव) यांनी याबाबत फिर्याद दिली आहे. बागुल वाहनचालक असून संशयितांनी त्यांच्याकडे एप्रिल महिन्यात हप्ता मागितला होता. मात्र त्यांनी तो दिला नाही.
या रागातून दुचाकींवर आलेल्या संशयितांनी सोमवारी (दि.१२) मध्यरात्री बागुलनगर भागात धुडघूस घातला. परिसरात दहशत माजवित टोळक्याने आपला मोर्चा बागुल यांच्या घरावर वळविला. धारदार कोयत्याने घराच्या खिडकीच्या काचा फोडत दरवाजावर कोयता मारला. यानंतर घराबाहेर पाणी भरूण ठेवलेले चार प्लॅस्टीकचे ड्रम फोडून नुकसान केले असून या घटनेने परिसरात भितीचे वातावरण पसरले आहे. विहीतगाव येथे गावगुंडाचा सर्रास वावर असून पोलीसांनी त्यांचा बंदोबस्त करावा अशी मागणी जोर धरू लागली आहे. अधिक तपास उपनिरीक्षक पवार करीत आहेत.
पिस्तूल बाळगणा-याला पोलीसांनी ठोकल्या बेड्या
नाशिक (इंडिया दर्पण वृत्तसेवा)- जेलरोड येथील पंचक भागात पिस्तूल बाळगणा-या एकास पोलीसांनी बेड्या ठोकल्या. संशयिताच्या ताब्यातून गावठी पिस्तूलसह जीवंत काडतुसे हस्तगत करण्यात आले असून याप्रकरणी नाशिकरोड पोलीस ठाण्यात गुन्हा दाखल करण्यात आला आहे.
आसिफ अन्सार कुरेशी (२६ रा.निमसे मळा, नांदूरनाका कमळवाडी) असे अटक करण्यात आलेल्या पिस्तूलधारीचे नाव आहे. पंचक येथील सायट्रीक समोरील मोकळया जागेत थांबलेल्या एका तरूणाकडे पिस्तूल असल्याची माहिती नाशिकरोड पोलीसांना मिळाली होती.
पथकाने सोमवारी (दि.१२) रात्री धाव घेत संशयिताची अंगझडती घेतली असता त्याच्याकडे गावठी बनावटीचा कट्टा व जीवंत काडतुस असा सुमारे २५ हजार ५०० रूपये किमतीचा ऐवज मिळून आला. याबाबत अंमलदार नितीन भामरे यांनी फिर्याद दिली असून अधिक तपास हवालदार टेमगर करीत आहेत.
