नाशिक (इंडिया दर्पण वृत्तसेवा)– असून, वेगवेगळया भागात झालेल्या तीन घरफोडीत चोरट्यांनी सुमारे दहा लाखाच्या ऐवजावर डल्ला मारला. त्यात एका टेक्सटाईल दुकानातील रोकड चोरीचा समावेश असून याप्रकरणी सातपूर,अंबड व नाशिकरोड पोलीस ठाण्यात घरफोडीचे गुन्हे दाखल करण्यात आले आहेत.
पोलीसांनी दिलेल्या माहितीनुसार आशिष जगदिश भट्टड (रा.श्रीकृष्णनगर कॉलनी) यांनी फिर्याद दिली आहे. भट्टड यांचे अशोकनगर येथील महेंद्रा कंपनीच्या मटेरियल गेट समोर प्रगती टेक्सटाईल्स मार्केट नावाचे कापड दुकान आहे. रविवारी (दि.२९) ही घटना घडली. तोडाला रूमाल बांधलेल्या अज्ञात चोरट्याने दुकानाच्या पाठीमागील खिडकीतून प्रवेश करून ही चोरी केली. टोपी व जॅकेट परिधान केलेल्या चोरट्यांनी गल्याचा ड्राव्हर कश्याने तरी तोडून घरपट्टी भरण्यासाठी ठेवलेली सुमारे साडे सात लाख रूपयांची रोकड चोरून नेली. ही घटना दुकानातील सीसीटिव्ही यंत्रणेत कैद झाली असून याप्रकरणी सातपूर पोलीस ठाण्यात घरफोडीचा गुन्हा दाखल करण्यात आला आहे. अधिक तपास उपनिरीक्षक रोहित गांगुर्डे करीत आहेत.
दुसरी घरफोडीची घटना सिडकोतील वृंदावन चौक भागात घडली. याबाबत स्नेहल महेश सोनजे यांनी फिर्याद दिली आहे. सोनजे कुटूंबिय बाहेरगावी गेले असता अज्ञात चोरट्यांनी गेल्या शुक्रवारी (दि.२०) बद घराचा कडीकोयंडा तोडून हॉलमधील कपाटात ठेवलेले सुमारे ३४ हजार रूपये किमतीचे सोन्याचांदीचे दागिणे चोरून नेले. याप्रकरणी अंबड पोलीस ठाण्यात गुन्हा दाखल करण्यात आला असून अधिक तपास हवालदार अतुल बनतोडे करीत आहेत.
तर शिंदे ता.जि.नाशिक येथे भरदिवसा झालेल्या घरफोडीत चोरट्यांनी सुमारे सव्वा दोन लाखाचा ऐवजावर डल्ला मारला. याबाबत रवी संतू पाळदे (रा.पठाण पेट्रोल पंपाजवळ,शिंदेगाव) यांनी फिर्याद दिली आहे. पाळदे कुटूंबिय शनिवारी (दि.२८) कामानिमीत्त घराबाहेर पडले असता ही घटना घडली. अज्ञात चोरट्यांनी त्यांच्या बंद घराचा कडीकोयंडा तोडून लोखंडी कपाटात ठेवलेली ६५ हजाराची रोकड व सोन्याचांदीचे दागिणे असा सुमारे २ लाख २२ हजाराचा ऐवज चोरून नेला. याबाबत नाशिकरोड पोलीस ठाण्यात गुन्हा दाखल करण्यात आला असून अधिक तपास हवालदार कु-हाडे करीत आहेत.
