नाशिक (इंडिया दर्पण वृत्तसेवा)– शहरात घरफोडीचे सत्र सुरूच असून वेगवेगळया भागात झालेल्या तीन घरफोडींमध्ये चोरट्यांनी सुमारे सव्वा अकरा लाखाच्या ऐवजावर डल्ला मारला. त्यात रोकडसह सोन्याचांदीच्या दागिन्यांचा समावेश आहे. याप्रकरणी म्हसरूळ, मुंबईनाका व अंबड पोलीस ठाण्यात गुन्हे दाखल करण्यात आले आहेत.
म्हसरूळ येथील रिलायन्सन पेट्रोलपंप परिसरात राहणारे निलेश शंकर शिंगे (३० रा.निसर्ग नगर) यांनी घरफोडीची पहिली तक्रार दिली आहे. शिंदे कुटुंबिय दि.१० ते १५ एप्रिल दरम्यान धार्मिक कार्यक्रमासाठी रायगड येथील गावी गेले असता ही घटना घडली. अज्ञात चोरट्यांनी त्यांच्या बंद फ्लॅटच्या उघड्या गॅलरीमधून घरात प्रवेश करीत ही चोरी केली. घरात शिरलेल्या चोरट्यांनी बेडरूममधील लोखंडी कपाटात ठेवलेले सुमारे ६ लाख ११ हजार ७३३ रूपये किमतीचे अलंकार चोरून नेले. याबाबत म्हसरूळ पोलीस ठाण्यात गुन्हा दाखल करण्यात आला असून अधिक तपास उपनिरीक्षक पटारे करीत आहेत.
दुसरी घटना पखालरोड भागात भरदिवसा घडली. प्रेमलता राजेश कापडणीस (रा. सागर सम्राट स्विटसच्या वरती) यांनी याबाबत फिर्याद दिली आहे. कापडणीस कुटुंबिय मंगळवारी (दि.१५) दुपारच्या सुमारास अल्पशा कामानिमित्त घराबाहेर पडले असता ही घटना घडली. अज्ञात चोरट्यांनी बंद घराचे सेफ्टी दरवाजाचे लॉक तोडून कपाटात ठेवलेली ९ हजाराची रोकड व सोन्याचांदीचे दागिणे असा सुमारे ५ लाख ४०० रूपयांचा ऐवज चोरून नेला. याबाबत मुंबईनाका पोलीस ठाण्यात गुन्हा दाखल करण्यात आला असून अधिक तपास सहाय्यक निरीक्षक शिरसाठ करीत आहेत.
तिसरी घटना चुंचाळे शिवारात घडली. विजय रामचंद्र शिरसाठ (रा.गोदावरीनगर, चुंचाळेशिवार) यांनी याबाबत फिर्याद दिली आहे. शिरसाठ कुटुंबिय मंगळवारी (दि.१५ ) बाहेरगावी गेले असता ही चोरी झाली. अज्ञात चोरट्यांनी त्यांच्या बंद घराचे कुलूप तोडून किचनमधील लोखंडी कपाटात ठेवलेले पाच हजाराची रोकड व सोन्याचांदीचे दागिणे असा सुमारे २५ हजाराचा ऐवज चोरून नेला. याप्रकरणी अंबड पोलीस ठाण्यात गुन्हा दाखल करण्यात आला असून अधिक तपास हवालदार झोले करीत आहेत.
