नाशिक (इंडिया दर्पण वृत्तसेवा)- कारखान्यात मशिनवर काम करीत असतांना अपघात झाल्याने ४९ वर्षीय कामगाराचा मृत्यू झाला. ही घटना औद्योगीक वसाहतीतील सोमेश फोर्ज कंपनीत घडली. याप्रकरणी सातपूर पोलीस ठाण्यात मृत्यूची नोंद करण्यात आली आहे.
राजेंद्र दिनकर पाटील (रा.चाणक्यनगर,खुटवडनगर) असे मृत कामगाराचे नाव आहे. पाटील सातपूर एमआयडीसीतील सोमेश फोर्ज कंपनीतील कामगार होते. मंगळवारी (दि.१५) सायंकाळी ते नेहमीप्रमाणे मशिनवर काम करीत असतांना ही घटना घडली. प्रोडक्शन सुरू असतांना मशिनचा काही तरी पार्ट अचानक सटकल्याने त्यांच्या पोटास गंभीर दुखापत झाली.
बेशुध्द अवस्थेत सुपरवायझर भुषण एकनाथ व हेमराज जाधव यांनी त्यांना तातडीने जिल्हा रूग्णालयात दाखल केले असता वैद्यकीय सुत्रांनी तपासून मृत घोषीत केले. अधिक तपास हवालदार बेंडकुळे करीत आहेत.
तडिपाराच्या पोलीसांनी मुसक्या आवळल्या
नाशिक (इंडिया दर्पण वृत्तसेवा)- हद्दपारीची कारवाई करूनही शहरात वावर ठेवणा-या तडिपाराच्या पोलीसांनी मुसक्या आवळल्या. ही कारवाई शहर गुन्हे शाखेच्या युनिट १ पथकाने सिडकोतील बडदे नगर भागात केली. याप्रकरणी अंबड पोलीस ठाण्यात गुन्हा दाखल करण्यात आला आहे.
अल्ताफ अलिम सय्यद (२६ रा.त्रिमुर्ती चौक सिडको) असे अटक करण्यात आलेल्या तडिपाराचे नाव आहे. अल्ताफ सय्यद याच्या गुन्हेगारी कारवाया रोखण्यासाठी पोलीसांनी त्याच्या विरूध्द हद्दपारीची कारवाई केली आहे. शहर आणि जिह्यातून त्यास दोन वर्षांसाठी हद्दपार केलेले असतांना त्याचा वावर शहरातच होता.
पोलीस त्याच्या मागावर असतांना सोमवारी (दि.१२) तो बडदेनगर येथील ७ स्टार बेकरी भागात मिळून आला याप्रकरणी हवालदार महेश साळुंके यांनी फिर्याद दिली असून अधिक तपास हवालदार आवारे करीत आहेत.
