नाशिक (इंडिया दर्पण वृत्तसेवा)– अलंकारावर वाढीव सोने देण्याचे आमिष दाखवून पोबारा करणा-या सराफास शहर पोलीसांनी पुण्यात बेड्या ठोकल्या. ही कारवाई शहर गुन्हे शाखेच्या युनिट १ च्या पथकाने केली. संशयितास सरकारवाडा पोलीसांच्या स्वाधिन करण्यात आले आहे.
सतिश कांतीलाल बेदमुथा उर्फ मुथा (५९ रा. जयदिप सोसा.सहकारनगर पुणे) असे अटक करण्यात आलेल्या सशयिताचे नाव आहे. शहरातील एका महिलेने याबाबत फिर्याद दिली होती. संशयिताचे मेसर्स कांतीलाल सुगनचंद सराफ नावाचे दुकान असून या दुकानात सन.२०१४ पासून महिलेचे जाणे येणे होते. पिढीजात सराफ असल्याने महिलेचे कुटुंबिय विश्वासाने संशयिताच्या दुकानात खरेदीसाठी जात होते. महिलेकडून दोन चार महिन्यात मोठी खरेदी होत असल्याने संशयिताने आमिष दाखवत ही फसवणुक केली. तुमचे सोन्याचे अलंकार दुकानात ठेवल्यास व्याजापोटी आठ टक्के वाढीव सोने देऊ असे आमिष दाखवित त्याने महिलेसह तिच्या आईला भुरळ पाडली. महिला व तिच्या आईने विश्वासाने दीड किलो हून अधिक वजनाचे दागिणे संशयिताच्या स्वाधिन केले. मात्र संशयिताने आपला गाशा गुंडाळल्याने हा प्रकार पोलीसात पोहचला.
गेल्या महिन्यात याप्रकरणी सरकारवाडा पोलीस ठाण्यात गुन्हा दाखल करण्यात आला होता. पोलीस संशयिताचा माग काढत असतानाच युनिट १ उपनिरीक्षक रविंद्र बागुल यांना मिळालेल्या माहितीच्या आधारे ही कारवाई करण्यात आली. संशयित सराफ पुण्यातील सहकार नगर भागात वास्तव्यास असल्याची माहिती मिळाल्याने पथकाने धाव घेत शुक्रवारी (दि.४) त्यास हुडकून काढले असून त्यास सरकारवाडा पोलीसांच्या स्वाधिन करण्यात आले आहे. ही कामगिरी वरिष्ठ निरीक्षक मधुकर कड यांच्या मार्गदर्शनाखाली उपनिरीक्षक रविंद्र बागुल,संदिप भांड,विशाल काठे,पोलीस नाईक विशाल देवरे,हवालदार धनंजय शिंदे अंमलदार जगेश्वर बोरसे व चालकर सुक्राम पवार आदींच्या पथकाने केली.
