नाशिक (इंडिया दर्पण वृत्तसेवा)– परप्रांतीय कामगाराच्या मृत्यू प्रकरणी अखेर ठेकेदारासह दोघा बांधकाम व्यावसायीकांविरोधात पंचवटी पोलीस ठाण्यात सदोष मनुष्यवधाचा गुन्हा दाखल करण्यात आला आहे. ही घटना पुणे विद्यार्थी वसतीगृहाच्या बांधकाम साईटवर घडली होती. तीसºया मजल्यावरून पडल्याने कामगाराचा मृत्यू झाला होता. ठेकेदार आणि बांधकाम व्यावसायीकांनी कामगारांच्या सुरक्षेच्या दृष्टीने उपाययोजना केल्या नाहीत त्यामुळे कामगाराचा मृत्यू झाल्याचा ठपका ठेवण्यात आला आहे.
ठेकेदार खलील अशरफ मोहम्मद, बांधकाम व्यावसायीक मनोज थोरात व विशाल पाटील अशी गुन्हा दाखल करण्यात आलेल्या संशयितांची नावे आहेत. याबाबत ललिता बरडे यांनी फिर्याद दिली आहे. या घटनेत कनसिंह सरदार बारेला उर्फ कनसिंग हरदास बरडे (मुळ रा.मध्यप्रदेश हल्ली काळाराम मंदिराच्या बाजूला पुणे विद्यार्थी वसतीगृह बांधकाम साईटवर) या परप्रांतीय कामगाराचा मृत्यू झाला. कनसिंह काळाराम मंदिर परिसरातील पुणे विद्यार्थी वसतीगृह बांधकाम साईटवर कामास होता.
९ डिसेंबर रोजी सकाळच्या सुमारास तो तिस-या मजल्यावर बांधकामास पाणी मारत असतांना ही घटना घडली होती. अचानक तोल गेल्याने तो जमिनीवर कोसळला होता. या घटनेत गंभीर दुखापत झाल्याने त्यास अपोलो त्यानंतर शताब्दी व आडगाव मेडिकल कॉलेज येथे उपचारार्थ हलविण्यात आले होते. महिनाभराच्या उपचारानंतरही त्याच्या प्रकृर्तीत सुधारणा न झाल्याने त्यास अधिक उपचारार्थ इंदोर येथील एमवायएच हॉस्पिटल मध्ये दाखल केले असता २४ फेब्रुवारी रोजी रात्री उपचार सुरू असतांना त्याचा मृत्यू झाला. या घटनेस संबधीत ठेकेदार व बांधकाम व्यावसायीक जबाबदार असल्याचा फिर्यादीत नमुद करण्यात आले असून अधिक तपास उपनिरीक्षक कैलास जाधव करीत आहेत.
