नाशिक (इंडिया दर्पण वृत्तसेवा)- काकूस शिवीगाळ व दमदाटी करीत पुतण्याने बेकायदा घरात घुसून चोरी केल्याचा प्रकार समोर आला आहे. या घटनेत १५ हजाराच्या रोकडसह महत्वाची कागदपत्र भामट्याने चोरून नेले असून पोलीसांनी तात्काळ संशयितास अटक केली आहे. याप्रकरणी पंचवटी पोलीस ठाण्यात गुन्हा दाखल करण्यात आला आहे.
दीपक सुनिल लोंढे असे अटक करण्यात आलेल्या संशयित पुतण्याचे नाव आहे. याबाबत पदमा रामा लोंढे (रा.दिंडोरीरोड,पंचवटी) यांनी फिर्याद दिली आहे. संशयित फिर्यादी लोंढे यांचा पुतण्या असून मंगळवारी (दि.१) त्यांच्यात वाद झाला होता. यावेळी संतप्त पुतण्याने जुन्या भांडणाची कुरापत काढून काकूस शिवीगाळ करीत दमदाटी केली होती.
त्यानंतर काकू कामावर गेली असता संशयिताने आजारी काका घरात झोपलेले असल्याची संधी साधत बेकायदा घरात शिरून १५ हजाराची रोकड व महत्वाचे कागदपत्र चोरून नेले होते. याबाबत तक्रार प्राप्त होताच पोलीसांनी संशयिताच्या मुसक्या आवळल्या असून अधिक तपास हवालदार सानप करीत आहेत.
