नाशिक (इंडिया दर्पण वृत्तसेवा)- परप्रातीयाने आदिवासी महिलेवर वेळोवेळी बळजबरीने बलात्कार केल्याची घटना समोर आली आहे. अश्लिल व्हिडीओ सोशल मीडियावर व्हायरल करण्याची धमकी देत हे कृत्य केले आहे. पीडिता बांधकाम सुरू असलेल्या साईटवर कुटूंबियासह वास्तव्यास असून या साईटवर संशयित सुपरवायझर आहे. कुटुंबियास जीवे ठार मारण्याची धमकी दिल्याने पीडितेने पोलीसात धाव घेतली असून याप्रकरणी पंचवटी पोलीस ठाण्यात बलात्कार, अ‍ॅट्रोसिटीसह विविध कलमान्वये गुन्हा दाखल करण्यात आला आहे. पोलीसांनी तात्काळ संशयितास अटक केली आहे.
पोलीसांनी दिलेल्या माहितीनुसार वसिम रहमतुल्लाह अक्तर (२४ मुळ रा.बिहार हल्ली सितागुंफाजवळ,पंचवटी) असे अटक करण्यात आलेल्या संशयिताचे नाव आहे. पीडितेचे कुटुंबिय जुना आडगाव नाका भागात नव्याने सुरू असलेल्या बांधकाम साईटवर वास्तव्यास आहे. पती पत्नी याच साईटवर मोलमजूरी करून वॉचमन राहत असून संशयित या साईटचा सुपरवायझर आहे. महिला एके दिवशी आंघोळ करीत संशयिताने नकळत आपल्या मोबाईलमध्ये व्हिडीओ घेतला होता. गेल्या मार्च महिन्यात हा व्हिडीओ दाखवून त्याने ब्लॅकमेल करीत महिलेवर बलात्कार केला. त्यानंतरही त्याने तब्बल चार महिने वारंवार व्हिडीओ व फोटो व्हायरल करण्याची धमकी देत आपले इप्सित साध्य केले.
या काळात संशयिताने महिलेस शालिमार भागातील एका लॉजवर घेवून बलात्कार केला. यावेळी त्याने महिलेसोबत अस्लिल फोटो व व्हिडीओ काढले. यानंतर त्याचा अत्याचार वाढल्याने महिलेने त्यास नकार दिला असता त्याने फोटो व्हिडीओ व्हायरल करण्याबरोबरच पतीसह मुलांना जीवे ठार मारण्याची धमकी दिल्याने पीडितेने पोलीसात धाव घेतली असून अधिक तपास उपनिरीक्षक जाधव करीत आहेत.
