नाशिक (इंडिया दर्पण वृत्तसेवा)- पैसे मागितल्याच्या रागातून चार जणांच्या टोळक्याने एका फळविक्रेत्यावर धारदार शस्त्राने हल्ला केल्याची घटना तिबेटीयन मार्केट भागात घडली. या घटनेत फळविक्रेत्याच्या डोक्यास गंभीर दुखापत झाली असून याप्रकरणी सरकारवाडा पोलीस ठाण्यात गुन्हा दाखल करण्यात आला आहे.
वेदांत पाटील, जोजो मायकल व त्यांचे दोन साथीदार अशी संशयितांची नावे आहेत. याप्रकरणी विपूल सतिष बत्तीसे (२० रा.बेथलेनगर,शरणपूररोड) यांनी फिर्याद दिली आहे. बत्तीसे तिबेटीयन मार्केट भागात फळविक्रीचा व्यवसाय करतात. बुधवारी (दि.२६) सायंकाळी ते परिसरात हातगाडीवर व्यवसाय करीत असतांना संशयितांनी त्यांच्याकडून फळे खरेदी केले. मात्र पैसे दिले नाही. त्यामुळे बत्तीसे यांनी पैश्यांची मागणी केली असता संशयितांनी शिवीगाळ करीत त्यास लाथाबुक्यानी मारहाण केली. या घटनेत एकाने धारदार शस्त्राने हल्ला केल्याने बत्तीसे गंभीर जखमी झाले असून अधिक तपास हवालदार गांगुर्डे करीत आहेत.
७० वर्षीय वृध्दाची आत्महत्या
नाशिक (इंडिया दर्पण वृत्तसेवा)- सातपूर परिसरातील कांबळेवाडीत राहणा-या ७० वर्षीय वृध्दाने गळफास लावून घेत आत्महत्या केली. सदर वृध्दाच्या आत्महत्येचे कारण स्पष्ट होवू शकले नाही. याबाबत सातपूर पोलीस ठाण्यात मृत्यूची नोंद करण्यात आली आहे.
सोमनाथ काकडू धनगरे असे मृत वृध्दाचे नाव आहे. धनगरे यांनी बुधवारी (दि.२६) अज्ञात कारणातून आपल्या राहत्या घराच्या आवारातील वॉल कंपाऊंड अ‍ॅगलला दोरी बांधून गळफास लावून घेतला होता. ही बाब निदर्शनास येताच मुलगा शिवराम धनगरे यांनी त्यांना तातडीने जिल्हा रूग्णालयात दाखल केले असता वैद्यकीय सुत्रांनी तपासून मृत घोषीत केले. अधिक तपास हवालदार घारे करीत आहेत.
