नाशिक (इंडिया दर्पण वृत्तसेवा)- पाथर्डी शिवारात टोळक्याने एका २० वर्षीय युवकावर प्राणघातक हल्ला केल्याची घटना घडली. या हल्यात धारदार कोयत्याने वार करण्यात आल्याने युवक गंभीर जखमी झाला असून त्याच्यावर उपचार सुरू आहेत. याप्रकरणी इंदिरानगर पोलीस ठाण्यात जीवे ठार मारण्याचा प्रयत्न केल्याप्रकरणी गुन्हा दाखल करण्यात आला आहे.
सिध्दार्थ गरूड, यश दोंदे, छोटा सिध्दू,स्वप्नील घायवटे व चिक्या (रा.सर्व पाथर्डी गाव) अशी गुन्हा दाखल करण्यात आलेल्या संशयित हल्लेखोरांची नावे आहेत. याबाबत शिल्पा सिध्दार्थ डाके (रा.स्वराज्यनगर,पाथर्डी फाटा) यांनी फिर्याद दिली आहे. या घटनेत रितेश हरिभाऊ लाठे (२०) हा युवक गंभीर जखमी झाला आहे. शिल्पा डाके यांचा रितेश लाठे हा भाऊ आहे. संशयित मुले आणि लाठे यांच्यात गल्लीत चकरा मारण्याच्या कारणातून वाद झाला होता.
रविवारी (दि.२३) रात्री पुन्हा संशयित स्वराज्यनगर भागात फिरण्यासाठी आले असता ही घटना घडली. नरहरी लॉन्स परिसरातील दातांच्या दवाख्याना भागात लाठे यांनी त्यांना टोकले असता संशयितांनी त्यास शिवीगाळ करीत बेदम मारहाण केली. या घटनेत एकाने धारदार कोयत्याने वार केल्याने रितेश लाठे गंभीर जखमी झाला असून त्याच्यावर उपचार सुरू आहेत. अधिक तपास उपनिरीक्षक शिरसाठ करीत आहेत.
