नाशिक (इंडिया दर्पण वृत्तसेवा)- आर्थिक वादातून बहिण मेव्हूण्याने एकावर चाकू हल्ला केल्याचा प्रकार कथडा भागात घडला. या घटनेत ३५ वर्षीय युवक जखमी झाला असून त्याच्यावर जिल्हा रूग्णालयात उपचार सुरू आहेत याप्रकरणी भद्रकाली पोलीस ठाण्यात गुन्हा दाखल करण्यात आला आहे.
रहिसा नजिर पिंजारी व नजिर बशिर पिंजारी (रा.गणी हॉलसमोर,कथडा जुनेनाशिक ) अशी गुन्हा दाखल करण्यात आलेल्या संशयित दांम्पत्याचे नाव आहे. याबाबत एजाज खुर्शीद शेख (रा. हिमालय बेकरी मागे,इंद्रकुंड) यांनी फिर्याद दिली आहे. रहिसा पिंजारी व जखमी एजाज शेख हे दोघे बहिण भाऊ आहेत. काही महिन्यांपूर्वी रहिसा पिंजारी यांना आर्थिक अडचण असल्यामुळे तिने आपल्या भावाकडे पैश्यांची मागणी केली होती.
शेख याने बहिणीसाठी २० हजार रूपयाची मदत केली होती. बरेच दिवस उलटूनही हातऊसनवार दिलेली रक्कम बहिणीने परत केली नाही म्हणून तो बुधवारी (दि.५) दुपारच्या पैसे मागण्यासाठी पिंजारी दांम्पत्याच्या घरी गेला असता ही घटना घडली. पैसे मागताच दांम्पत्याने त्यास शिवीगाळ केली. यावेळी बहिणीने पैसे देण्यास नकार देत आपल्या भावाचे दोन्ही हात पकडून ठेवले असता मेव्हण्याने त्याच्यावर चाकू हल्ला केला. या घटनेत कमरेवर चाकू खोपसण्यात आल्याने एजाज शेख जखमी झाला असून त्याने कशीबशी सुटका करून घेत जिल्हा रूग्णालय गाठले आहे. अधिक तपास हवालदार काकड करीत आहेत.
