नाशिक (इंडिया दर्पण वृत्तसेवा)– महिला मृत्यू प्रकरणात हलगर्जीपणा केल्याचा आरोप करीत दोघा समाजवेकांसह रूग्णालयातील आजी माजी अधिका-यांनी डॉक्टरकडे दहा लाखांच्या खंडणीची मागणी केल्याचा धक्कादायक प्रकार समोर आला आहे. या घटनेने एकच खळबळ उडाली असून सिव्हील मधील राजकारण चव्हाट्यावर आले आहे. याप्रकरणी सरकारवाडा पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार राहूल खुर्चे, रवी पगारे रूग्णालयाचे माजी डॉ. आनंद पवार व कार्यालयीन अधिक्षक व्ही.डी.पाटील अशी गुन्हा दाखल करण्यात आलेल्या संशयितांची नावे आहेत. याबाबत जिल्हा रूग्णालयाचे वैद्यकीय अधिकारी डॉ.प्रतिक अशोक भांगरे (वय ३८, रा. कॉलेज रोड) यांनी फिर्याद दिली आहे. डॉ. भांगरे हे सिव्हिलच्या अतिदक्षता विभागात कार्यरत आहेत. जिल्हा रुग्णालयात ३१ जानेवारी रोजी ही घटना घडली होती. दिपाली झोले या गर्भवती महिलेस उपचारार्थ दाखल केल्यावर प्रसूतीनंतर मूत्रपिंड निकामी झाल्याचे समोर आल्याने तिला संदर्भ सेवा रुग्णालयात हलविण्यात आले होते. या ठिकाणी उपचारादरम्यान झोले यांचा मृत्यू झाला.
यानंतर ४ फेब्रुवारी रोजी संशयित खुर्चे व पगारे यांनी झोले यांचे नातलग असल्याचा दावा केला. जिल्हा शल्यचिकित्सक डॉ. चारुदत्त शिंदे यांची भेट घेत झोलेच्या मृत्यूला डॉ. भांगरेसह इतर वैद्यकीय अधिकारी व कर्मचारी जबाबदार असल्याचा दावा केला. त्यामुळे चौकशी समिती नेमली असताना झोले यांचे नातलग नसतानाही खुर्चेसह इतरांनी संगनमताने डॉ. भांगरे यांच्यावर झोले याच्या मृत्यूचा आरोप करीत दहा लाख रुपयांच्या खंडणीची मागणी केली. वारंवार पैशांची मागणी व जीवे मारण्यासह गुन्हा नोंदवून जन्मठेपेची शिक्षा मिळवून देण्याची धमकी देण्यात आल्याने त्रस्त डॉ. भांगरे यांनी पोलिसांत धाव घेतली असून अधिक तपास वरिष्ठ निरीक्षक सुरेश आव्हाड यांच्या मार्गदर्शनाखाली सुरू आहे.
