नाशिक (इंडिया दर्पण वृत्तसेवा)- नाशिक पुणे मार्गावरील शिखरेवाडी भागात भरदिवसा झालेल्या घरफोडीत चोरट्यांनी सुमारे साडे सोळा लाख रूपये किमतीच्या ऐवजावर डल्ला मारला. त्यात सोन्याचांदीच्या दागिण्यांचा समावेश आहे. याप्रकरणी उपनगर पोलीस ठाण्यात घरफोडीचा गुन्हा दाखल करण्यात आला आहे.
सुनिल बाबुराव गोडसे (रा.अंगणछाया सोसा.प्रकाशनगर शिखरेवाडी) यांनी याबाबत फिर्याद दिली आहे. गोडसे कुटुंबिय मंगळवारी दुपारी अल्पशा कामानिमित्त घराबाहेर पडले असता ही घटना घडली.
अज्ञात चोरट्यांनी त्यांच्या बंद घराचा कडीकोयंडा तोडून बेडरूममधील कपाटात ठेवलेले १६ लाख ५० हजार किमतीचे दागिणे चोरून नेले. अधिक तपास निरीक्षक फुलपगारे करीत आहेत.
