नाशिक (इंडिया दर्पण वृत्तसेवा)- प्रेमप्रकरणातून युवतीवर चाकू हल्ला झाल्याची घटना ताजी असतांना, मंगळवारी (दि.११) पाठलाग करीत आलेल्या तरूणाने महाविद्यालयीन युवतीचा विनयभंग केला. भररस्त्यात शिवीगाळ करीत संशयिताने मारहाण केली असून, यावेळी युवतीच्या मैत्रीणी मदतीस धावून आल्या असता त्यांना लोटून देत संशयिताने धुम ठोकली. याप्रकरणी सरकारवाडा पोलीस ठाण्यात गुन्हा दाखल करण्यात आला आहे.
अभिजीत तुपसुंदर (रा.सातपूर) असे गुन्हा दाखल करण्यात आलेल्या संशयिताचे नाव आहे. पीडित तरूणी मंगळवारी (दि. ११) नेहमीप्रमाणे महाविद्यालयात आली होती. व्ही.एन.नाईक महाविद्यालयाच्या प्रवेशद्वाराजवळून ती आपल्या मैत्रीणींसमवेत रस्त्याने पायी जात असतांना ही घटना घडली. कॉलेज सुटल्याने घराकडे जाणा-या युवतीची वाट अडवित त्याने विनयभंग केला. यावेळी त्याने तुला माझ्या सोबत बोलावे लागेल असे म्हणत तिच्याशी हुज्जत घातली. तरूणीने त्याच्याकडे दुर्लक्ष करीत पुढे जाण्याचा प्रयत्न केला असता संशयिताने आरडाओरड करत तरुणीला शिवीगाळ केली. यावेळी गर्दी जमल्याने त्यास अधिक चेव आला.
दमबाजी करीत असतांना पीडितेने प्रतिकार करण्याचा प्रयत्न केला असता त्याने थेट मारहाण केली. यावेळी तरूणीच्या मैत्रीणींनी तिच्या मदतीसाठी धाव घेतली असता संशयितानी त्यांना लोटून देत धुम ठोकली. या घटनेमुळे परिसरात भितीचे वातावरण निर्माण झाले होते. भयभित झालेल्या तरूणींनीनी पोलिस ठाणे गाठून आपबिती कथन केल्याने पोलिस दप्तरी हा गुन्हा दाखल करण्यात आला असून अधिक तपास हवालदार अनिल जाधव करीत आहेत.
