नाशिक (इंडिया दर्पण वृत्तसेवा)- शहरात चोरट्यांनी धुमाकूळ घातला असून वेगवेगळ्या भागात झालेल्या तीन घरफोडींमध्ये चोरट्यांनी सुमारे सव्वा सात लाखाच्या ऐवजावर डल्ला मारला. त्यात रोकडसह सोन्याचांदीच्या दागिन्यांचा समावेश आहे. याप्रकरणी आडगाव उपनगर व अंबड पोलीस ठाण्यात गुन्हे दाखल करण्यात आले आहेत.
पोलीसांनी दिलेल्या माहितीनुसार पहिली घरफोडीची घटना नविन आडगावनाका भागात घडली. विकास यशवंत धात्रक (रा.समरि अपा.जुने स्वामी नारायण मंदिर) यांनी याबाबत फिर्याद दिली आहे. धात्रक कुटुंबिय सोमवारी (दि.३) बाहेरगावी गेले असता ही घटना घडली. अज्ञात चोरट्यांनी बंद घराचा कडीकोयंडा तोडून बेडरूममधील कपाटात ठेवलेली २० हजाराची रोकड व सोन्याचांदीचे दागिणे असा सुमारे २ लाख ४६ हजार ५०० रूपयांचा ऐवज चोरून नेला. याबाबत आडगाव पोलीस ठाण्यात गुन्हा दाखल करण्यात आला असून अधिक तपास हवालदार अहिरे करीत आहेत.
दुसरी घटना उंटवाडी भागात घडली. राजेश गंगाधर पाटील (रा.परिमल बंगला,तिडकेनगर) यांनी याबाबत फिर्याद दिली आहे. पाटील कुटूंबिय गेल्या २३ जानेवारी रोजी बाहेरगावी गेले असता ही घटना घडली. अज्ञात चोरट्यांनी बेडरूच्या खिडकीचे गज वाकवून ही चोरी केली. बंगल्यात शिरलेल्या चोरट्यांनी बेडरूममधील अलमारीत ठेवलेली २० हजाराची रोकड व सोन्याचांदीचे दागिणे असा सुमारे दोन लाखाचा ऐवज चोरून नेला. याप्रकरणी अंबड पोलीस ठाण्यात गुन्हा दाखल करण्यात आला असून अधकि तपास हवालदार महाजन करीत आहेत.
तिसरी घटना तपोवन लिंकरोड भागात घडली. याबाबत नरेश राधाकृष्ण धनजल (रा.श्रीहरी रेसि.उत्तरानगर) यांनी फिर्याद दिली आहे. धनजल कुटुंबिय मंगळवारी (दि.४) अल्पावधीसाठी घराबाहेर पडले असता ही घटना घडली. अज्ञात चोरट्यांनी भरदिवसा त्यांच्या बंद घराचा कडीकोयंडा तोडून बेडरूममधील कपाटात ठेवलेली १ लाख २५ हजाराची रोकड व सोन्याचांदीचे दागिणे असा सुमारे २ लाख ९० हजाराचा ऐवज चोरून नेला. याबाबत उपनगर पोलीस ठाण्यात गुन्हा दाखल करण्यात आला असून अधिक तपास उपनिरीक्षक पावरा करीत आहेत.
