नाशिक (इंडिया दर्पण वृत्तसेवा)– गहाण ठेवलेल्या इनोव्हा कारचा एकाने परस्पर अपहार केल्याचा प्रकार समोर आला आहे. सावकारीतून हा प्रकार घडल्याचे बोलले जात असून याप्रकरणी मुंबईनाका पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार फिरोज शेख (रा.भारतनगर) असे गुन्हा दाखल करण्यात आलेल्या संशयिताचे नाव आहे. याबाबत नजमा हमीद शेख (रा.पंचशिलनगर गंजमाळ) यांनी फिर्याद दिली आहे. शेख यांचा मुलगा दानिश हमीद शेख याने जितेश तुपलोंढे यांच्याकडून भाडेतत्वावर टोयोटा कार एमएच ०४ इके २२२१ कराराने घेतली होती. गेल्या मे महिन्यात आर्थिक अडचण असल्याने त्यांनी ती फिरोज शेख या संशयिताकडे १ लाख ३० हजारात तारण गहाण ठेवली असता ही घटना घडली. संशयित शेथ याने सदर वाहनाचा परस्पर अपहार केल्याचे तक्रारीत म्हटले आहे. अधिक तपास हवालदार म्हैसधुणे करीत आहेत.
दानपेटीतील रोकडसह पितळी वस्तूवर डल्ला
नाशिक (इंडिया दर्पण वृत्तसेवा)- रोकडोबावाडी भागातील गणपती मंदिरातून चोरट्यांनी दानपेटीतील रोकडसह पितळी वस्तूवर डल्ला मारला. त्यात सनई घंटाचा समावेश आहे. याप्रकरणी उपनगर पोलीस ठाण्यात चोरीचा गुन्हा दाखल करण्यात आला आहे.
यशवंत जगन्नाथ मोरे (रा.डोबी मळा रोकडोबावाडी,दे.गाव) यांनी याबाबत फिर्याद दिली आहे. रोकडोबावाडी येथील वालदेवी नदी तिरी असलेल्या आण्णा गणपती मंदिरात ही घटना घडली. अज्ञात चोरट्यांनी मंदिराच्या भिंतीवरून उडी मारून ही चोरी केली. मंदिरात शिरलेल्या चोरट्यांनी दानपेटी उघडून सुमारे ४५ हजाराची रोकड पितळी सनई आणि चार घंट्या असा ४९ हजाराचा ऐवज चोरून नेला. अधिक तपास उपनिरीक्षक कोकाटे करीत आहेत.
