नाशिक (इंडिया दर्पण वृत्तसेवा)- शहरात आत्महत्येचे सत्र सुरूच असून बुधवारी (दि.२९) वेगवेगळया भागात राहणा-या चौघांनी आत्महत्या केली. त्यात दोन महिलांसह अनोळखी पुरूष आणि एका तरूणाचा समावेश आहे. या आत्महत्येचे कारण स्पष्ट होवू शकले नाही. याप्रकरणी उपनगर सातपूर,पंचवटी व भद्रकाली पोलीस ठाण्यात मृत्यूच्या नोंदी करण्यात आल्या आहेत.
पोलीसांनी दिलेल्या माहितीनुसार नाशिक पुणे मार्गावरून धावणा-या एमएच १४ एलएल १८३८ या आयशर मालट्रक समोर एका ५५ वर्षीय अनोळखी इसमाने झोकून देत आत्महत्या केली. मंगळवारी रात्री ही घटना घडली. ट्रकच्या धडकेत जखमी झालेल्या व्यक्तीस पोलीसांनी तात्काळ जिल्हा रूग्णालयात दाखल केले असता उपचारापूर्वी वैद्यकीय सुत्रांनी त्यास मृत घोषीत केले. याबाबत उपनगर पोलीसात मृत्यूची नोंद करण्यात आली असून अधिक तपास पोलीस हवालदार पी.एस.बोडके करीत आहेत.
दुसरी घटना सातपूर अंबड लिंक रोड भागात घली. रेखा यशवंत माळी (५७ रा. बालाजी व्हिलेज रो हाऊस) या महिलेने मंगळवारी रात्री अज्ञात कारणातून आपल्या राहत्या घरी विषारी औषध सेवन केले होते. ही बाब निदर्शनास येताच कुटूंबियांनी तिला बेशुध्द अवस्थेत जिल्हा रूग्णालयात दाखल केले असता वैद्यकीय सुत्रांनी तपासून मृत घोषीत केले. याबाबत सातपूर पोलीस ठाण्यात मृत्यूची नोंद करण्यात आली असून अधिक तपास जमादार पाटील करीत आहेत.
तिसरी घटना पेठरोडवरील समर्थनगर भागात घडली. ज्योती श्याम जाधव (४२ रा.साईस्नेह अपा.अष्टविनायकनगर शरदचंद्र पवार मार्केट मागे) या विवाहीतेने बुधवारी अज्ञात कारणातून आपल्या राहत्या सोसायटीच्या पार्किंगमध्ये असलेल्या पाण्याच्या टाकीत उडी मारून आत्महत्या केली. बेशुध्द अवस्थेत त्या पाण्याच्या टाकीत तरंगतांना आढळून आल्याने त्यांना दीर सचिन जाधव व पती श्याम जाधव यांनी तात्काळ जिल्हा रूग्णालयात दाखल केले असता वैद्यकीय सुत्रानी तपासून मृत घोषीत केले. याबाबत पंचवटी पोलीस ठाण्यात मृत्यूची नोद करण्यात आली असून अधिक तपास हवालदार संतोष कोरडे करीत आहेत.
चौथ्या घटनेत अरमान आहेसन इलाही कुरेशी (२२ रा.फुले मार्केट घास बाजार,कोकणीपुरा) या युवकाने बुधवारी आपल्या राहत्या घरी अज्ञात कारणातून दुकानाच्या स्टोअरेजमध्ये लोखंडी अ‍ॅगलला ओढणी बांधून गळफास लावून घेतला होता. ही बाब निदर्शनास येताच कुटुंबियांनी त्यास तात्काळ जिल्हा रूग्णालयात दाखल केले असता वैद्यकीय सुत्रांनी मृत घोषीत केले. याबाबत भद्रकाली पोलीस ठाण्यात मृत्यूची नोंद करण्यात आली असून अधिक तपास हवालदार बोळे करीत आहेत.
