नाशिक (इंडिया दर्पण वृत्तसेवा) – मागील भांडणाची कुरापत काढून तरूणावर प्राणघातक हल्ला करण्यात आल्याची घटना गंजमाळ भागात घडली. या घटनेत युवक गंभीर जखमी झाला असून पोलीसांनी तिन हल्लेखोरांना तात्काळ अटक केली आहे. याप्रकरणी भद्रकाली पोलीस ठाण्यात गुन्हा दाखल करण्यात आला आहे.
नाजिम बाबर पठाण, रेहान अन्सार शेख व सुरज सिताराम शेवरे (रा.पंचशिलनगर,गंजमाळ) अशी अटक करण्यात आलेल्या संशयित हल्लेखोरांची नावे आहेत. याबाबत अरबाज उर्फ सोनू रफिक बेग (२५ रा. डॉ. बाबासाहेब आंबेडकर पुतळ््यामागे पंचशिलनगर,गंजमाळ) या युवकाने फिर्याद दिली आहे. बेग गुरूवारी (दि.१९) रात्री परिसरातील अल्याभाऊ यांच्या भंगार दुकान परिसरात गेला असता ही घटना घडली. संशयितांनी त्यास गाठून मागील भांडणाची कुरापत काढली.
यावेळी संतप्त नजिम पठाण या संशयिताने कोयत्याने तर उर्वरीत दोघांनी काही तरी धारदार शस्त्राने वार केले. या घटनेत बेग गंभीर जखमी झाला असून त्याच्या जबाबावरून तिघा संशयितांविरोधात जीवे ठार मारण्याचा प्रयत्न केल्याप्रकरणी गुन्हा दाखल करण्यात आला आहे. पोलीसांनी तात्काळ तिघांना अटक केली असून अधिक तपास उपनिरीक्षक शिंदे करीत आहेत.
