नाशिक (इंडिया दर्पण वृत्तसेवा) – शहरात वाहनचोरीची मालिका सुरू असून वेगवेगळया भागातून चार मोटारसायकली चोरट्यांनी चोरून नेल्या. त्यात पंचवटी पोलीस ठाणे हद्दीतील दोन चोरीच्या घटनांचा समावेश आहे. याप्रकरणी पंचवटी, आडगाव व अंबड पोलीस ठाण्यात गुन्हे दाखल करण्यात आले आहेत.
तपोवनरोड भागातील नाना रामनाथ जगताप (रा.विश्वगिरी अपा.आईस्क्रीम फॅक्टरीजवळ) यांची डिस्क्व्हर दुचाकी एमएच १५ इडी ९२६४ बुधवारी (दि.१८) रात्री त्यांच्या सोसायटीच्या आवारात लावलेली असतांना ती चोरट्यांनी चोरून नेली. दुसरी घटना गोदाघाटावर घडली. रविंद्र कुमार सिंग (रा.जाधव संकुल,सातपूर अंबड लिंकरोड) यांनी याबाबत फिर्याद दिली आहे. सिंग गुरूवारी (दि.१९) सायंकाळच्या सुमारास गोदाघाटावर गेले होते. यशवंत पटांगणावर पार्क केलेली त्यांची एमएच १५ डीई ९६१७ मोटारसायकल चोरट्यांनी पळवून नेली. दोन्ही घटनांप्रकरणी पंचवटी पोलीस ठाण्यात वेगवेगळे गुन्हे दाखल करण्यात आले असून अधिक तपास पोलीस नाईक लोणारे व हवालदार शिंदे करीत आहेत.
तिसरी घटना तपोवन भागात घडली. श्री लक्ष्मी नारायण मंदिर ट्रस्टच्या मंगल कार्यालयाबाहेर लावलेली स्कुटी एमएच १५ जीडे १२५३ चोरट्यांनी चोरून नेली. ही घटना गुरूवारी (दि.१९) सकाळच्या सुमारास घडली. याबाबत बळवंत हरी वाणी (रा.वडाळा पाथर्डी रोड) यांनी फिर्याद दिली आहे. याप्रकरणी आडगाव पोलीस ठाण्यात गुन्हा दाखल करण्यात आला असून अधिक तपास हवालदार देसाई करीत आहेत. तर नरेंद्र जिभाऊ शिरसाठ (रा.कालिका पार्क,उंटवाडी) यांची अ‍ॅक्टीव्हा एमएच ३१ डीएल ७४७१ गेल्या मंगळवारी (दि.१६) सिडकोतील त्रिमुर्तीचौक येथील विशाल वाईन शॉप शेजारील भंगार दुकानासमोर पार्क केलेली असतांना ती चोरट्यांनी चोरून नेली. याप्रकरणी अंबड पोलीस ठाण्यात गुन्हा दाखल करण्यात आला असून अधिक तपास हवालदार महाजन करीत आहेत.
