नाशिक (इंडिया दर्पण वृत्तसेवा)- जेलमधील पतीस बाहेर काढण्यासाठी जामिनदार मिळवून देण्याचा बहाणा करीत टोळक्याने एका विवाहीतेवर बळजबरीने बलात्कार केल्याचा प्रकार समोर आला आहे. हा प्रकार चोपडा लॉन्स भागात घडला आहे. याप्रकरणी पंचवटी पोलीस ठाण्यात पाच जणांविरोधात गुन्हा दाखल करण्यात आला असून त्यातील दोघांना बेड्या ठोकण्यात आल्या आहेत.
अमित विजय दामले (२५ रा.व्हाईट हाऊस मागे मिशन मळा,शरणपूररोड) व गोपाल राजेंद्र नागोलकर (२५ रा.बेथलेनगर शरणपूररोड) अशी अटक करण्यात आलेल्या संशयितांची नावे असून या घटनेतील दिलीप विष्णू गायकवाड (२८ रा.सिध्दार्थनगर कॉलेजरोड) गोप्या व अन्य एक जण अद्याप फरार आहेत. मुंबईत वास्तव्यास असलेल्या पीडितेने याबाबत नाशिकरोड पोलीस ठाण्यात फिर्याद दिली असून हा गुन्हा पंचवटी पोलीसांकडे वर्ग करण्यात आला आहे. पीडितेच्या आई वडिलांची फारकत झाली आहे. दोघांनी वेगवेगळे संसार थाटल्याने पीडिता वडिलांसमवेत मुंबईतील सावत्र आईकडे वास्तव्यास होती.
आई वडिलांसमवेत नाशिकमध्ये राहत असतांना तिचे संशयित गायकवाड याच्या भावाशी प्रेमसंबध जुळले होते. या प्रकरणात पीडिता व तिच्या प्रियकराने पळून जावून प्रेमविवाह केल्याने हा प्रकार घडला. सावत्र आईच्या फिर्यादीवरून पतीविरोधात मुंबईत मुलीचे अपहरण आणि बलात्काराचा गुन्हा दाखल असून तो सध्या जेलमध्ये आहे. त्यास तुरूंगातून सोडण्यासाठी पीडितेचा जामिनदार मिळविण्यासाठी अटापिटा सुरू असतांना तिने पतीच्या भावाशी संपर्क साधला असता ही घटना घडली.
संशयित गायकवाड याने बोलावल्याने पीडिता बुधवारी (दि.२२) सकाळी नाशकात दाखल झाली होती. संशयित टोळक्याने तिला चोपडा लॉन्स परिसरातील एचपी पेट्रोल पंपाच्या मागील गव्हाच्या शेतात घेवून जात तिच्यावर बळजबरीने बलात्कार केला. विवाहीतेने कसेबसे नाशिकरोड पोलीस ठाणे गाठून याबाबत फिर्याद दिली असून पंचवटी पोलीसांनी दोघांना बेड्या ठोकल्या आहेत. अधिक तपास सहाय्यक निरीक्षक अश्विनी पाटील करीत आहेत.
