नाशिक (इंडिया दर्पण वृत्तसेवा)- गणेशवाडी भागात बँकेत भरणा करण्यासाठी जाणा-या कामगारास मारहाण करीत दोघांनी रोकडसह दुचाकी पळविल्याची घटना घडली. या घटनेत सुमारे सव्वा चार लाखाच्या रोकडवर भामट्यांनी डल्ला मारला असून याप्रकरणी पंचवटी पोलीस ठाण्यात जबरीचोरीचा गुन्हा दाखल करण्यात आला आहे.
पोलीसांनी दिलेल्या माहितीनुसार फराण खान मुदसर खान (१९ रा.पंचशिलनगर) व रशिद नामक युवक अशी गुन्हा दाखल करण्यात आलेल्या संशयित लुटारूंची नावे आहेत. याप्रकरणी संजय बाबुलाल सोळंकी (रा.मधुबन कॉलनी,पंचवटी) यांनी फिर्याद दिली आहे. सोळंकी नानावलीतील जहांगिर मंगल कार्यालय परिसरात असलेल्या प्रशांत मार्केटींग अ‍ॅण्ड डिस्ट्रीब्युटर्स या एजन्सीमध्ये काम करतात.
बुधवारी (दि.१८) नेहमी प्रमाणे ते कामावर गेले असता मालक प्रफुल्ल जैन यांनी त्यास जमा झालेली रोकड शरणपूररोडवरील डीबीएस बँकेत भरणा करण्यासाठी पाठविले असता ही घटना घडली. सोळंकी यांनी ४ लाख १७ हजार रूपयांची रोकड सोबत घेवून ते दुचाकीवर बँकेत भरणा करण्यासाठी जात असतांना ही लुटमार झाली. गणेशवाडी येथील सुलभ शौचालय परिसरातून ते एमएच १५ सीएफ १२१४ या अ‍ॅक्टीव्हा दुचाकीवरून प्रवास करीत असतांना भामट्यांनी त्यांची वाट अडविली. यावेळी दुकलीने जीवे मारण्याची धमकी देत सोळंकी यांना मारहाण केली. या घटनेत भामट्यांनी सोळंकी यांच्या ताब्यातील रोकड व दुचाकी बळजबरीने हिसकावून घेत पोबारा केला. अधिक तपास सहाय्यक निरीक्षक विलास पडोळकर करीत आहेत.
