नाशिक (इंडिया दर्पण वृत्तसेवा)- कपडे खरेदी करून घराकडे परतणा-या अल्पवयीन मुलीचा एकाने विनयभंग केल्याचा प्रकार सह्याद्री हॉस्पिटल भागात घडला. भावासमोर संशयिताने अश्लिल हावभाव केल्याने हा प्रकार पोलीसात पोहचला असून, याप्रकरणी मुंबईनाका पोलीस ठाण्यात विनयभंग आणि पोस्को कायद्यान्वये गुन्हा दाखल करण्यात आला आहे.
समीर तबारक चौधरी (रा.त्रिकोणी गार्डन,काठेगल्ली) असे संशयिताचे नाव आहे. पीडिता व संशयित एकमेकांचे परिचीत असून मुलगी आपल्या भावासमवेत सोमवारी (दि.१६) कपडे खरेदी करण्यासाठी सह्याद्री हॉस्पिटल भागात गेली होती. खरेदी करून दोघे भाऊ बहिण घराकडे परतत असतांना सिग्नलवर पाठीमागून दुचाकीवर आलेल्या संशयिताने तिचा विनयभंग केला. अधिक तपास जमादार वाघ करीत आहेत.
दोघा तडिपाराना पोलीसांनी ठोकल्या बेड्या
नाशिक (इंडिया दर्पण वृत्तसेवा)- हद्दपारीची कारवाई करूनही शहरात वावरणा-या दोघा तडिपाराना पोलीसांनी बेड्या ठोकल्या. सातपूर आणि अंबड पोलीस ठाणे हद्दीत संशयिताच्या मुसक्या आवळल्या असून याप्रकरणी पोलीस दप्तरी नोंद करण्यात आली आहे.
पोलीसांनी दिलेल्या माहितीनुसार स्वप्निल अरूण गांगुर्डे (३१ रा. जय माता वैष्णवी हौ.सोसा. जाधव संकुल,अशोकनगर) व गुरूदेव बलदेव देवल उर्फ गोपी (२७ रा.घरकुल योजना,चुंचाळे) अशी गुन्हा दाखल करण्यात आलेल्या संशयित तडिपाराचे नाव आहे. गांगुर्डे व देवल याच्या गुन्हेगारी पार्श्वभूमिवर शहर पोलीसांनी त्याच्यावर हद्दपारीची कारवाई केली आहे. शहर व जिह्यातून त्यांना एक व दोन वर्षासाठी हद्दपार केलेले असतांनाही त्याचा वावर शहरातच असल्याची माहिती पोलीसाना मिळाली होती.
पोलीस त्याच्या मागावर असतांना दोघे मंगळवारी (दि.१७) वेगवेगळया भागात मिळून आले. याबाबत अंमलदार सागर गुंजाळ व किरण सोनवणे यांनी दिलेल्या फिर्यादीवरून सातपूर आणि अंबड पोलीस ठाण्यात गुह्याची नोंद करण्यात आली असून अधिक तपास हवालदार खरपडे व चव्हाण करीत आहेत.
