नाशिक (इंडिया दर्पण वृत्तसेवा) – शतपावली करीत असतांना भरधाव वाहनाने धडक दिल्याने ५१ वर्षीय व्यक्तीचा मृत्यू झाला. हा अपघात नाशिक पुणे मार्गावरील डीजीपीनगर येथे झाला. याप्रकरणी उपनगर पोलीस ठाण्यात मृत्यूची नोद करण्यात आली आहे.
पोलीसांनी दिलेल्या माहितीनुसार तुषार बाळकृष्ण धांडे (रा.आकृती हाईटस,डीजीपीनगर) असे मृत व्यक्तीचे नाव आहे. धांडे शनिवारी (दि.१४) रात्री जेवण आटोपून नेहमीप्रमाणे फेरफटका मारण्यासाठी घराबाहेर पडले असता ही घटना घडली. इंदिरानगर रोडने ते शतपावली करीत असतांना भरधाव अज्ञात वाहनाने त्यांना धडक दली होती. या घटनेत त्यांच्या डोक्यास गंभीर दुखापत झाल्याने उपचारादरम्यान त्यांचा मृत्यू झाला. याबाबत प्रतिक्षा धांडे यांनी दिेलेल्या फिर्यादीवरून अपघाताची नोंद करण्यात आली असून अधिक तपास जमादार बकाल करीत आहेत.
दुचाकीस्वारास त्रिकुटाने बेदम मारहाण करीत लुटले
नाशिक (इंडिया दर्पण वृत्तसेवा) – दुचाकीवरून घराकडे निघालेल्या एकास त्रिकुटाने बेदम मारहाण करीत लुटले. ही घटना वर्दळीच्या गोळे कॉलनी भागात घडली असून या घटनेत भामट्यांनी रोकडसह मोबाईल बळजबरीने हिसकावून पोबारा केला आहे. याप्रकरणी सरकारवाडा पोलीस ठाण्यात जबरीचोरीचा गुन्हा दाखल करण्यात आला आहे.
महेश अरविंद चौधरी (४३ रा.अभ्योदय कॉलनी,गंगापूररोड) यांनी याबाबत फिर्याद दिली आहे. चौधरी रविवारी (दि.१५) रात्री आपल्या अ‍ॅक्टीव्हा दुचाकीने घराकडे जात असतांना ही घटना घडली. गोळे कॉलनीतून ते दुचाकीवर प्रवास करीत असतांना पाठीमागून अ‍ॅक्टीव्हावर ट्रिपलसीट आलेल्या भामट्यांनी लाथ मारून त्यांना खाली पाडले. यानंतर टोळक्याने त्यांना बेदम मारहाण करीत त्यांची हॅण्ड बॅग व मोबाईल बळजबरीने हिसकावून घेत पोबारा केला. हॅण्ड बॅगेत दहा हजाराची रोकड होती. या घटनेत सुमारे १६ हजाराचा ऐवज भामट्यांनी पळविला असून अधिक तपास निरीक्षक जानकर करीत आहेत.
