नाशिक (इंडिया दर्पण वृत्तसेवा) – शहरात वाहनचोरीची मालिका सुरू असून घरासमोर पार्क केलेल्या अ‍ॅटोरिक्षासह वेगवेगळया भागातून चार मोटासायकली चोरट्यांनी चोरून नेल्या. याप्रकरणी पंचवटी,अंबड,सरकारवाडा,उपनगर व भद्रकाली पोलीस ठाण्यात गुन्हयाच्या नोंदी करण्यात आल्या असून चोरट्यांचा बंदोबस्त करावा अशी मागणी होवू लागली आहे.
भारतनगर येथील आवेश इक्बाल शेख (रा.शिवाजीवाडी) यांची अ‍ॅटोरिक्षा एमएच १५एफयू ६१९२ गुरूवारी (दि.१२) सायंकाळच्या सुमारास नानावली येथील फेमस बेकरी भागात पार्क केलेली असताना ती चोरट्यांनी चोरून नेली. याबाबत भद्रकाली पोलीस ठाण्यात गुन्हा दाखल करण्यात आला असून अधिक तपास हवालदार पवार करीत आहेत. मोटारसायकल चोरीची पहिली घटना मखमलाबाद नाका भागात घडली. विक्रंत किशोर गायकवाड (रा.गौतम कॉलनी) यांनी फिर्याद दिली आहे. गायकवाड यांची पल्सर एमएच १५ जीएम ५१४३ गुरूवारी रात्री त्यांच्या सोसायटीच्या पार्किंगमध्ये लावलेली असतांना ती चोरट्यांनी पळवून नेली. याबाबत पंचवटी पोलीस ठाण्यात गुन्हा दाखल करण्यात आला असून अधिक तपास हवालदार नाईक करीत आहेत.
दुसरी घटना कॅनडा कॉर्नर भागात घडली. योगेश पुंजू पाटील (रा.दौतलनगर,सिडको) यांनी फिर्याद दिली आहे. पाटील बुधवारी (दि.११) कॅनडा कॉर्नर भागात गेले होते. विराज कॉम्प्लेक्स येथील पार्किंगमध्ये त्यांची एमएच १५ डीझेड ९५९१ लावलेली असतांना ती चोरट्यांनी चोरून नेली. याबाबत सरकारवाडा पोलीस ठाण्यात गुन्हा दाखल करण्यात आला असून अधिक तपास हवालदार गायकवाड करीत आहेत. तिसरी घटना सिडकोत घडली. चंद्रकला शांताराम भोये (रा.अनुष्का अपा.भाद्रपत सेक्टर सिडको) यांनी याबाबत फिर्याद दिली आहे. भोये यांची ड्रिम योगा एमएच १५ एचबी २१४६ मोटारसायकल बुधवारी (दि.११) त्यांच्या सोसायटीच्या पार्किंगमध्ये लावलेली असतांना चोरट्यांनी ती चोरून नेली. याबाबत अंबड पोलीस ठाण्यात गुन्हा दाखल करण्यात आला असून अधिक तपास जमादार शेख करीत आहेत.
तर स्वप्निल दत्तात्रेय आगळे (२२ रा.पळसे ता.जि.नाशिक) यांची स्प्लेंडर एमएच १५ सीजे ४४१३ गेल्या २९ ऑगष्ट रोजी दुपारच्या सुमारास मुक्तीधाम येथील स्टार प्लस मॉल येथे पार्क केलेली असताना ती चोरट्यांनी चोरून नेली. याप्रकरणी उपनगर पोलीस ठाण्यात गुन्हा दाखल करण्यात आला असून अधिक तपास हवालदार घेगडमल करीत आहेत.
