नाशिक (इंडिया दर्पण वृत्तसेवा)- विंचूरगवळी ता.जि.नाशिक येथे झालेल्या घरफोडीत चोरट्यांनी सुमारे दीड लाखाचा ऐवज चोरून नेला. त्यात दीड लाखाच्या रोकडसह सोन्याचांदीच्या दागिण्यांचा समावेश आहे. याप्रकरणी आडगाव पोलीस ठाण्यात घरफोडीचा गुन्हा दाखल करण्यात आला आहे.
सोमनाथ मुरलीधर गवळी (रा.गंगापूर कॅनल ८ नंबर चारी,विंचूरगवळी) यांनी याबाबत फिर्याद दिली आहे. गवळी कुटूंबिय बुधवारी (दि.११) बाहेरगावी गेले असता ही घटना घडली. अज्ञात चोरट्यांनी त्यांच्या बंद घराचा कडीकोयंडा तोडून बेडरूममधील लोखंडी कपाटत ठेवलेली दीड लाखाची रोकड व सोन्याचांदीचे दागिणे असा सुमारे २ लाख १७ हजाराचा ऐवज चोरून नेला. अधिक तपास हवालदार बनकर करीत आहेत.
दोन इलेक्ट्रीक ट्रान्सफार्मरमधील ऑईलवर चोरट्यांचा डल्ला
नाशिक (इंडिया दर्पण वृत्तसेवा)- औद्योगीक वसाहतीतील दोन इलेक्ट्रीक ट्रान्सफार्मरमधील ऑईलवर चोरट्यांनी डल्ला मारला. गेल्या काही महिन्यात या ट्रान्सफार्मरमधील तब्बल ३ लाख ३८ हजाराचे ऑईल चोरीस गेले असून याप्रकरणी अंबड पोलीस ठाण्यात गुन्हा दाखल करण्यात आला आहे.
वीज कंपनीचे सहाय्यक अभियंता गणेश माणिकराव कुशारे (रा.तारवालानगर) यांनी याबाबत फिर्याद दिली आहे. अंबड औद्योगीक वसाहतीतील वीज कंपनीच्या दोन इलेक्ट्रीक ट्रान्सफार्मरमधून चोरट्यांनी ऑईल चोरून नेले. दि.२८ फेब्रुवारी ते आज पर्यंत तब्बल ३ लाख ३८ हजार ३०० रूपये किमतीचे आईल चोरट्यानी चोरून नेले असून अधिक तपास उपनिरीक्षक पाटील करीत आहेत.
